Bireýge kómek bermesten aldyn myna nárselerdi bilip alǵanyńyz jón, dep habarlaıdy aqshamnews.kz Ernur.kz-ke silteme jasap.
Tatýlyq, jaqsylyq jasaý, kómek berý týraly jıi aıtylyp jatady. Óte durys. Áıtse de, «pálensheniń sol jaqsylyǵyn umytpaımyn», «myń alǵys», «túgenshege Alla razy bolsyn!», «Rahmet!» degennen góri, «Jaqsylyǵymdy umytty», «beker kómek berippin», «jaqsylyqty túsinbeıtin adam eken», «Men odan kómek suraǵan joqpyn, endi nege mindetsinedi?» deıtinderdi kóp kezdestiremiz. «Sonda eshkimge jaqsylyq jasamaý kerek pe?» degen suraq týyndaıdy. Bul suraq kópti oılandyratyny anyq. Árıne, jaqsylyq jasaýdy shekteýge bolmaıdy, jaqsylyq jasaýdan jarysaıyq. Óıtkeni, bul qaıyrymdylyq, qaıyr-sadaqanyń bir túri.
Jasaǵan kez kelgen jaqsylyǵyńyz áıteýir bir kúni ózińizdi izdep tabary anyq. Buǵan kúmánińiz bolmasyn. Meıli, osylaı degen adamdardyń sózine senbegenińizben, Alla-Taǵalanyń sózine senesiz, solaı ǵoı? Alla-Taǵala Qurandaǵy Zilzala súresiniń 7-8 aıattarynda «Kimde kim tozańnyń salmaǵyndaı jaqsylyq istese, saýabyn kóredi. Kimde kim tozańnyń salmaǵyndaı jamandyq istese, sonyń zardabyn tartady» deıdi. Abaı atamyz aıtpaqshy, Allanyń ózi de ras, sózi de ras. Árıne, eshkim sizdi jaqsylyq jasaýǵa májbúrlemeıdi. Oǵan quqyǵy da joq.
Degenmen, mynadaı qarapaıym erejelerdi bilip júrińiz:
Jaqsylyqty aldymen ózińe jasa Keıbir adamdar ózine jetpeı jatsa da, basqalardyń qolyn qaıtarǵysy kelmeıdi. Mysaly, óziniń anasy bir jerge aparyp kelshi dep ótinish aıtsa, jumysynyń kóptigin syltaýratyp, dosynyń nemese áıeliniń anasy ótinish aıtsa, joq deı almaı, aldynda zyr júgiredi. Dál solaı, óz áıeline nemese kúıeýine jekirip, basqanyń áıeline nemese kúıeýine bar jyly sózderin arnaıtyndar da bar. Balalarǵa da solaı. Bul óz úıińdegi shyraqty basqa bireýdiń úıine aparyp jaǵyp qoıǵanmen teń. Óziń qarańǵyda otyryp, ózgeniń úıiniń jaryq bolǵanynan saǵan qandaı paıda bar? Óz áıeliń jylap otyrsa, ózge áıeldiń kúlgeninen ne paıda? Siz aı emessiz, búkil jer sharyna jaryǵyńyz jetetin, siz kún emessiz, búkil álemge jylý syılaıtyn. Meıli siz bildeı bir mekemeniń basshysy shyǵarsyz, biraq siz eń aldymen, bireýdiń balasy, bireýdiń jary, aǵa-inisi, ata-anasy, baýyry ekenińizdi esten shyǵarmańyz. Olaı bolsa, eń birinshi jaqsylyqty ózińizge, sosyn ata-anańyzǵa, áıelińiz ben bala-shaǵańyzǵa jasańyz. Jylýyńyz ben jaryǵyńyz artylyp jatsa, baýyrlaryńyzǵa, sosyn aǵaıyn-týysqanǵa, odan soń qalǵan muqtaj adamdarǵa jasańyz. Sonda da jaqsylyqty aldymen ózińizge jasańyz. Bireýge jaqsylyq jasaǵyńyz kelse, Alla razylyǵy úshin jasańyz da, ol týraly umytyńyz. Óıtkeni, eske alǵan saıyn mindetsinýińiz ábden múmkin. Bireýge jasaǵan jaqsylyǵyńyz ózińizge jasaǵan jaqsylyǵyńyz dep uǵyńyz. Al aǵaıynǵa «balyq berme, qarmaq ber» degen qaǵıdany ustansańyz bolady. Mamandyq tańdap bermeńiz, jar tańdap bermeńiz, eger sizden keńes surasa «júregińdi tyńda» dep jaýap berińiz. Óıtkeni, ózi qalamaǵan mamandyǵymen ómir súrse, ómir boıy sizdi kinálaýy múmkin.
Al, jar tańdaý máselesi tym názik taqyryp. Otbasy bolǵan soń, ydys-aıaq syldyrlamaı turmaıdy. Sondaı kezde tańdaý jasaǵan siz taǵy da kináli bolyp shyǵasyz. Sodan keıin kólik satyp ápermeńiz. Kólik baǵaly syılyq, biraq ol qansha jerden jaqsy bolsa da, onymen adam ómiri baılanysty. Kólik emes, onyń júrgizýishisi osal bolyp, bir jaǵdaıǵa ushyrap qalsa, orny tolmas ókinishte qalyp, barlyq adam kólik satyp ápergen sizdi kinálaıdy. Sondyqtan, jaqsylyqtyń tek materıaldyq ólshemmen ǵana shektemeńiz, aqshalaı kómek qana jaqsylyq degen uǵym qate. Jaqsy sózben qoldaý da, jaqsy kitapty oqýǵa keńes berý de, tipti bireýdiń ómir súrýine kedergi bolmaý da úlken kómek qazirgi kezde. Jas mamanǵa, jas kelinge kómekteskińiz kelse, onymen birge isteńiz. Sheberge kómekteskińiz kelse, kedergi bolmańyz. Al, aqymaqqa kómekteskińiz kelse, onda ózińiz de aqymaqsyz. Tyńdaǵysy kelmegenge aqyl aıtpańyz.
Járdemdi de aqylmen jasańyz. Óıtkeni, sizdiń kómegińiz bireýdiń ómirin ózgerter, al taǵy bireýdiń ómirin búldirýi de múmkin. al ózińiz bireýden kómek suraıtyn bolsańyz, surańyz. Biraq, kómektespese renjimeńiz. Óıtkeni, ata-ana perzentinen, múgedek jan ózgeden kómek kútýine ruqsat. Qalǵandary eńbek etip, tek ózine sengeni jón. Ózine ǵana senip, ózgeden kómek kútýdi doǵarǵanda ǵana ol eshkimge renjimeıtin bolady.