Almatyda Afrıka qurlyǵynyń 60-tan astam azamaty Qazaqstannyń kóshi-qon zańnamasyn buzǵan, dep habarlaıdy Almaty-akshamy.kz.
Almaty qalasynyń kóshi-qon qyzmetiniń málimetinshe, jyl basynan beri Afrıkanyń 64 azamaty ustaldy, onyń 55-i Nıgerıa, 5-i Kamerýn, ekeýi Ońtústik Afrıka jáne ekeýi Kot-d’Ivýar jáne Serra-Leone eliniń azamaty.
«Sot sheshimimen olardyń 12-si Qazaqstannyń aýmaǵynan shyǵaryldy. Tájirıbe kórsetkendeı, Afrıka elderiniń azamattarynyń kópshiligi Qazaqstanǵa týrısik, jumys nemese oqý vızalarymen keledi. Alaıda olardyń birazy ýaqytynda elderine ketpeı, Qazaqstannyń kóshi-qon zańnamasyn buzǵan», - dedi Almaty qalalyq polısıa departamentiniń kóshi-qon qyzmeti basqarmasynyń bastyǵy Asqat Býtýnchınov.
Onyń sózinshe, Almatyda ótken respýblıkalyq «Nelegal» is-sharasy kúnderinde sheteldikterdi shaqyrýshy tarap qyzmetin atqaryp, qonaqtardyń elderine ýaqytynda ketýin qamtamasyz etpegen 5 fırma anyqtalǵan, dep jazdy QazAqparat. Bul zańdy tulǵalar QR ÁQBtK-niń 518-baby boıynsha jaýapqa tartyldy. Taǵy bir jeke kásipker osyndaı zań buzýshylyqtyń qaıtalanýyna baılanysty shetel azamattaryn shaqyrý lısenzıasynan aıyrylǵan. Sonymen qatar is-shara kúnderinde sheteldik jumys kúshin qaıta tartýdyń eki deregi anyqtalyp, joly kesildi.