Afrıka múıisinde toqtaýsyz jaýyp jatqan jańbyr sý tasqynyna ulasyp, 270-ke jýyq adam qaza tapty, 900-den astam adam úıin tastap ketýge májbúr boldy. Bul týraly Damý máseleleri boıynsha Úkimetaralyq organ janyndaǵy /ICPAC/ Klımattyq boljamdar jáne klımat derekterin qoldaný ortalyǵyna silteme jasap Sınhýa málim etti, dep habarlaıdy almaty-akshamy.kz.
Málimdemede jaısyz aýa raıynan Efıopıa, Kenıa men Somalı qatty zardap shekti. Keıingi eki elde jaýyn-shashyn bir aıdan beri toqtamaı jatyr.
«Afrıka múıisi qazirgi ýaqytta El-Nıno týdyrǵan jaýyn-shashyn men sý tasqynynan zardap shegip otyr. Bul jaǵdaı adamdar men janýarlardyń ólimine jáne Somalı, Kenıa men Efıopıa turǵyndarynyń jappaı kóshýine ákep soqty», – dep habarlady ICPAC.
Jergilikti bılik ókilderi Somalıde aýa raıy saldarynan 100 adam, Kenıada – 120, Efıopıada 46 turǵyn mert bolǵanyn málim etti.
Turǵyndary kóbirek kóshken óńir Somalı bolyp tur. Onda 700 myń adam úıin tastap ketti. Kenıada 136 myń adam jáne Efıopıada 50 myńǵa jýyq turǵyn bas saýǵalaýǵa májbúr boldy.
ICPAC baǵalaýynsha, sý tasqanynan Somalıde 1,5 mıllıonnan astam adam, Kenıada 950 myńnan astam, Efıopıada 101 myńnan astam turǵyn zardap shekti.