AES salýǵa qansha qarajat qajet bolatyny tıisti tehnologıany tańdaǵannan keıin naqty anyqtalady. Bul týraly Energetıka mınıstrligi Atom energetıkasy jáne ónerkásibi departamenti dırektorynyń orynbasary Ǵanı Álıuly aıtty, dep habarlaıdy Almaty-akshamy.kz.
«Qazir energıa qaýipsizdigin qamtamasyz etý elimizde basty mindetterdiń biri sanalady. Elimizde elektr energıasyna suranystyń artýy, kómirtegi beıtaraptyǵyna kóshýdi eskere otyryp, bizge ekologıalyq taza energıa kózi kerek. Energetıkalyq qaýipsizdikti gaz, jańartylatyn energıa kózi arqyly qamtamasyz etýge bolady, biraq AES salý máselesi de qarastyrylyp jatyr. Atom elektr stansıasy biraz ýaqyt boıy turaqty energıa berýge qaýqarly», - dedi Ǵ. Álıuly.
Osy oraıda ol atom energıasy «jasyl energıaǵa» jatatynyn eske saldy. Qýaty 1 myń MVt elektr stansıasynyń bir blogy elimizde jylyna 4 mln tonnaǵa deıin kómirtekti zıandy zattardy azaıtýǵa yqpal ete alady.
«Elimizde gaz resýrstarynyń shekteýli bolýyna baılanysty elektr energıasyn gaz generasıasymen tolyq qamtamasyz ete almaımyz. Jańartylǵan energıa kózderi de ekologıa jaǵynan taza bolýyna qaramastan, tabıǵı-klımattyq faktorǵa táýeldi. Iaǵnı turaqty energıa kózi bola almaıdy. Atap aıtqanda, atom energetıkasy elimizde ǵylymnyń damýyna yqpal etedi dep sanaımyn. Sondyqtan AES salý - elimizdegi tozyǵy jetken dástúrli energıa kózderin almastyrýǵa baǵyttalǵan perspektıvaly sheshim», - dedi departament ókili.
Onyń aıtýynsha, AES salýǵa qatysty elimizde tıisti sheshim jasalsa, onda eki bloktan turatyn nysannyń qurylysyna shamamen 10-12 jyl ýaqyt kerek.
«Álemdegi tájirıbege qarasaq, eki energıa blogynan turatyn stansıa salýǵa shamamen 12 mlrd AQSH dollary kerek. Jalpy, bul baǵyttaǵy shyǵyndar tıisti tehnologıany tańdap, jobalaý-smetalyq qujattardy ázirlegennen keıin naqty anyqtalady», - dedi Ǵanı Álıuly.
Onyń sózine qaraǵanda, qazir Energetıka mınıstrligi salalyq uıymdarmen birlese 4 eldiń ıadrolyq tehnologıalaryn zerttep jatyr. Osy oraıda salalyq kompanıalarmen kelisózder jalǵasyp jatyr.
«Bul turǵyda ár eldiń ozyq tehnologıalaryn tańdaý arqyly konsorsıým máselesin de pysyqtap jatyrmyz», - dedi maman.