Satbayev University qaýymdastyrylǵan profesory Inesh Kenjına atom energetıkasyn Qazaqstannyń energetıkalyq qurylymyna engizý arqyly eldiń SO2 shyǵaryndylaryn aıtarlyqtaı azaıtýǵa jáne Parıj kelisimi boıynsha halyqaralyq mindettemelerdi oryndaýǵa múmkindik beretinine senimdi ekenin aıtty, dep habarlaıdy aqshamnews.kz
– Energetıka qurylymyn osylaısha ártaraptandyrý elektr energıasyn tutyný kóleminde kómir generasıasynyń úlesin aıtarlyqtaı azaıtady. Bul tek jańartylatyn energıa kózderi men gaz generasıasy arqyly ǵana emes, sonymen qatar atom generasıasynyń arqasynda júzege asady. Munyń barlyǵy ekologıalyq turǵydan úlken áser beredi, – dep málimdedi Inesh Kenjına.
Sarapshynyń pikirinshe, AES engizý eldiń energetıkalyq táýelsizdigin arttyryp, halyqaralyq ekologıalyq talaptarǵa saı bolýǵa múmkindik beredi. Qazirgi tańda álemniń kóptegen elderi, sonyń ishinde Fransıa, Kanada jáne Japonıa, atom energetıkasyn qoldaný arqyly ózderiniń kómirtek izderin qysqartýda. Qazaqstanda da osy jolmen júrý arqyly kómirtek beıtaraptylyǵyna jetýge yqpal etetin mańyzdy qadam jasalady.
Inesh Kenjınanyń aıtýynsha, Qazaqstan 2060 jylǵa deıingi kómirtek beıtaraptyǵy boıynsha óz strategıasyn júzege asyrýda, al atom energetıkasy bul maqsatqa jetýdiń basty faktorlarynyń biri bolmaq. Sonymen qatar, jańartylatyn energıa kózderimen birge atom energıasy eldiń energıa júıesin turaqty ári senimdi etedi.
– Qazaqstannyń tabıǵı resýrstarǵa baı bolýy, sonyń ishinde ýran qorynyń moldyǵy, ózimizdiń atom elektr stansıalaryn damytýǵa jáne energıany eksporttaý áleýetin arttyrýǵa múmkindik beredi, – dep atap ótti Kenjına.