Prezıdent Qasym-Jomart Toqaev BAQ salasy qyzmetkerlerin marapattaý rásiminde sóılegen sózinde elde atom elektr stansasyn salý jobasy týraly pikir bildirdi, dep habarlaıdy almaty-akshamy.kz.
«Ózderińiz jaqsy bilesizder, ekonomıkany damytý úshin turaqty energıa kózi kerek. Sondyqtan men atom elektr stansasyn salý máselesin pysyqtaý týraly naqty tapsyrma berdim. Qazir jan-jaqty talqylaý bolyp jatyr. Ártúrli pikir aıtylyp jatyr. Bul úderiske buqaralyq aqparat quraldary da belsene atsalysýy kerek», - dedi ol.
Memleket basshysynyń paıymdaýynsha, elimizde atom energetıkasyn damytýǵa zor múmkindik bar.
«Ony durys, ıaǵnı tıimdi paıdalanǵan jón. Osy máselege qatysty sońǵy sheshimdi halyq qabyldaıdy. Referendým bıyl kúzde ótedi. Úkimet naqty datany aıqyndaıdy», - dedi Prezıdent.