Prezıdent Teleradıokesheniniń kreatıv dırektory, prodúser Nurlan Qoıanbaev Almatyda ótip jatqan «Tartyl Fest» festıvali týraly pikirin bólisti.
- 4-5 aı buryn ártúrli suhbattarda buqaralyq sportty damytý týraly aıtqanmyn. Barlyq adamdardyń qol jetetindeı múmkindik jasasaq degen oı bolǵan. Jaqynda Qazaqstan Prezıdentiniń qoldaýymen «Dara» daryndylardy qoldaý» qory ashyldy. Bul qor el ishinde osyndaı iri sharalar ótkizip, myqty-myqty azamattarymyzdy iriktep, olardy álemdik jarystarǵa alyp baratyn kópir bolýy kerek. Basty maqsatymyz – osy. Eger osyndaı festıvalderden óz jolyn bastap, halyqaralyq saıystarda jigitterimiz júldeli oryndar alyp jatsa, bul jastarymyz úshin úlken ónege bolady. Sondaı-aq buqaralyq sporttyń damýyna úlken úles qosady.
«Tartyl Fest» – «Dara» daryndylardy qoldaý» qory uıymdastyrǵan alǵashqy shara. Festıvál buǵan deıin Taldyqorǵan jáne Qonaev qalalarynda ótti.
Búgingi sharany tek jarys retinde emes, mereke retinde uıymdastyrǵymyz keldi. Degenmen osynsha kóp adam keledi dep oılamadyq. Adamdardyń sportqa degen qyzyǵýshylyǵy kóńil qýantady. Jalpy festıválde jarystan bólek, konsert te mýzyka da bolady. Onyń sebebi, qazir áleýmettik jelilerde, el arasynda negatıv kóp. «Áreket bar da, bereket bar» demekshi, osy kúni Almaty halqyna qýanysh syılaıtyndaı shara ótkizgimiz keldi.
Men ózim tańerteń kelip, 4 ret tartyldym. Onda turǵan eshqandaı uıat joq. Bul kórsetkishke ár qalada eki retten qosyp turmaqpyn. Jarys ózi 60 kún bolady. Barlyq 20 qalany aralap bolǵanda, 15-20 ret tartylamyn degen nıettemin. Bul – meniń aldyma qoıǵan maqsatym. Osy chellendj arqyly jastarǵa kúndelikti sportpen aınalysýdyń paıdasyn kórsetip, dáriptegim keledi.
Taǵy bir maqsatymyz – festıvaldi jyl saıyn ótkizý. Bul shara jylda ótkiziletin bolsa, aldaǵy 5-6 jylda sportqa qyzyǵatyn, denesi shynyqqan mıllondaǵan azamat tárbıeleımiz degen oıdamyn.