«Tartyl Fest» jobasynyń ambassadory, Qazaqstandaǵy Street workout qozǵalysynyń negizin qalaýshylardyń biri Aıtym Jaqypov Almatydaǵy sporttyq merekeniń qalaı ótip jatqandyǵy týraly aıtyp berdi.
«Birinshi kezekte «Dara» talanttardy qoldaý qory men Almaty ákimdigine is-sharany uıymdastyrýdaǵy kómegi men halyq arasynda buqaralyq sportty damytýdaǵy úlesi úshin alǵys aıtamyn.
Almaty búgin shynymen de barlyq rekordtardy jańartyp jatyr. Tańǵy saǵat 9-dardyń ózinde qatysýshylardyń kezegi «Abaı» alańynan kóshege deıin sozyldy. Buǵan deıin Taldyqorǵan qalasynda qatysýshylar jalpy somada 4731 ret tartylǵan. Búgin ońtústik astanamyzda bul kórsetkish jańaryp, kúnniń aıaǵyna deıin azamattarymyz keminde 10 myń ret tartylady dep oılamyz.
Negizi maqsat – buqaralyq sportty damytý, salaýatty ómir saltyn dáripteý. Sondyqtan qandaı sportta bolmasyn durys baǵytta, erejelerge saı jarysaıyq.
Barlyq qatysýshylardy kásibı sportshylar baqylap, nátıjelerin jazyp alýda. Búgingi tóreshilerdiń qaı qaısysy da tartylý erejelerin óte jaqsy biledi. Aldaǵy ýaqytta osy tobymyzben elimizdiń 20 qalasyn aralaýdy josparlap otyrmyz. Ár qaladaǵy júldeli oryndar men aqshalaı syılyqtar beriledi. Al qyrkúıek aıynda barlyq myqtylar elordamyzǵa shaqyrylyp, Nur-Sultan qalasynda sheshýshi jarys ótedi.
Artyq aıtqanym emes, búgin Qazaqstandaǵy Street workout salasy damý qarqyny boıynsha álemde birinshi orynda dep aıta alamyn. Sebebi bizdiń elimiz – álemdegi Street workout-qa memlekettik deńgeıde kómek kórsetetin jalǵyz memleket.
Qatysýshylardyń jas tobynyń negizgi bóligin 18-30 jastaǵy azamattarymyz quraıdy. Alaıda qaı qalaǵa barsaq ta tartylýǵa kelgen kishkentaı búldirshinder men aqsaqaldarymyzdy kóremiz. Bul árıne kóńil qýantady. Street workout-qa barlyq jastaǵy adamdar qatysa alady jáne ol densaýlyqty kúsheıtýge kómektesedi».