Bul jaıynda Seýlde ótken ushqyshsyz ushaqtardyń úshinshi kórmesinde aıtyldy.
Onda qalalyq áýe kóliginiń bolashaǵy talqylandy, dep habarlaıdy Almaty-akshamy.kz 24.kz saıtyna silteme jasap.
Jyl saıyn drondardyń jyldamdyǵy artyp keledi. Ońtústik Koreıada ushqyshsyz ushaqtar jańa qoldanys tapty. Olar teatr qoıylymdary kezinde qoldanylady. Drondar artıserdi almastyryp, qustar men juldyzdardy beıneleı alady. Sondaı-aq ushaqtar jarys, kedergilerden ótý jáne fýtbol syndy oıyndarda paıdalanylady. Sportshylar tek drondardy basqarý ǵana emes, olardy qurastyra da bilýi tıis. Drondar qyzyq oıynshyqtan alyp qarýǵa aınaldy. Qazir Koreıa da jaýyngerlik ushaqtar jasaýda. Eldegi alǵashqy stels-dronnyń 70 paıyzy daıyn.
«Biz jasandy ıntellekti bar drondy jasap shyǵardyq. Onyń salmaǵy nebári 2 keli jáne ol tikeleı rejımde obektiler men adamdardyń ornalasqan jeriniń naqty koordınattaryn bere alady. Fermerler men tótenshe jaǵdaılar qyzmetkerlerine kómektesetin drondar kóbeıip keledi. Myna qurylǵy adam qoly jetpeıtin jerlerde órt sóndirgish suıyqtyqty shashady», - deıdi kompanıa prezıdenti Chon Djın Ho.
«Bizdiń dron elektr qýatymen jumys isteıtindikten, parnıktik gazdardy shyǵarmaıdy. Saǵatyna 320 shaqyrym jyldamdyq Seýlden Inchhonǵa deıin 50 shaqyrymdy 15 mınýtta baǵyndyrýǵa múmkindik beredi. Batareıany 10 mınýt ishinde tolyq zarádtaýǵa bolady. Qazirgi ýaqytta ushqyshsyz ushaqtyń syıymdylyǵy 7 oryn, biraq biz jolaýshylar sanyn 15-ke jetkizý úshin jumys istep jatyrmyz», - deıdi kompanıa prezıdenti O Son Chol.
Qalalyq áýe kóligi jobasyn júzege asyrý úshin dron jasaıtyn kompanıalar Úkimetten qarjylyq qoldaý, salyqtyq jeńildikter men erejelerdi jeńildetýdi suraıdy. Bul ınfraqurylym salý men qyzmetkerlerdi oqytý úshin qajet.
«Salanyń damýy úshin qajetsiz erejelerden arylý kerek. Bizde bul salanyń álemdik kóshbasshysy bolýǵa jaqsy múmkindik bar. Qalalyq áýe kóligi az adamdarǵa arnalǵan kólik retinde emes, qoljetimdi quny men yńǵaılylyǵymen jappaı qoldanysqa engziletin kólik retinde qarastyrylady dep úmittenemin», - deıdi Koreıa jer, ınfraqurylym jáne kólik mınıstri Von Hı Ren.
Qalalyq áýe qozǵalysy týraly zań jobasy kelesi aıda Koreıa Parlamentine joldanady. Qujat maquldansa, jolaýshylardy ushqyshsyz ushaqtarda tasymaldaýǵa 2025 jyldan bastap ruqsat etiledi.