Bul İİM basshysy Marat Ahmetjanovtyń málimdemesi.
Búgin Prezıdenttiń qabyldaýynda bolǵan mınıstr elimizdegi krımınogendik ahýal jóninde jáne 30 maýsymda ótken İshki ister mınıstrliginiń keńeıtilgen alqa otyrysynda berilgen tapsyrmalardyń oryndalý barysy týraly málimet berdi, dep habarlaıdy Almaty-akshamy.kz
Kezdesýde Qasym-Jomart Toqaevqa qylmys sanynyń azaıǵany jóninde baıandaldy. Marat Ahmetjanovtyń aıtýynsha, kisi óltirý, buzaqylyq, urlyq, qaraqshylyq, tonaý, mal urlyǵy, densaýlyqqa aýyr zaqym keltirý jáne basqa da qylmystar aıtarlyqtaı azaıǵan.
Prezıdentke elordada iske asyrylyp jatqan CyberPol jobasynyń nátıjeleri tanystyryldy. Joba ınternet-alaıaqtyqqa qarsy is-qımyldy jetildirýge baǵyttalǵan.
Sonymen qatar mınıstr esirtki qylmysyna qarsy kúres baǵytynda júrgizilip jatqan jumystardyń qorytyndysy týraly esep berdi. Jyl basynan beri quqyq qorǵaý jáne arnaýly organdardyń birlesken kúsh-jigeriniń nátıjesinde 14,3 tonna esirtki, sonyń ishinde 71,5 keli geroın, 652 keli sıntetıkalyq esirtki tárkilendi. Sondaı-aq 52 esirtki zerthanasyn joıylyp, 85 tonna prekýrsor tárkilendi.
Budan bólek, uıymdasqan qylmystyq toptardyń áreketteri boıynsha 37 qylmystyq is tergelip jatyr. Adam saýdasyna baılanysty 111 qylmys anyqtaldy.
Prezıdentke otbasylyq-turmystyq salada zorlyq-zombylyq jasaǵandarǵa qatysty jaýapkershilikti qatańdatý sharalary týraly da aıtyldy. Qazir mundaı quqyqbuzýshylyqtar jábirlenýshiniń aryz-shaǵymynsyz tirkelip, is qozǵala beredi.
Memleket basshysyna jol-kólik oqıǵalarynyń aldyn alý jáne sheteldik avtokólikterdi zańdastyrý jumystarynyń nátıjeleri týraly baıandaldy.
Kezdesý sońynda prezıdent quqyq qorǵaý organdaryna azamattardyń konstıtýsıalyq quqyqtarynyń qatań saqtalýyn qamtamasyz etýdi tapsyrdy. Sonymen birge Qasym-Jomart Toqaev İİM basshylyǵyna quqyqtyq tártip pen qoǵamdyq qaýipsizdik deńgeıin odan ári arttyrý jóninde birqatar mindet júktedi.