Búgingi kúni Qazaqstanda adam papıllomasy vırýsyna (APV) qarsy vaksınamen 11-13 jas aralyǵyndaǵy 54,5 myńnan astam qyz bala egildi.
Qazan aıynyń basynan bastap elimizdiń ár óńirinde jatyr moıny obyrynyń negizgi qozdyrǵyshy bolyp tabylatyn adam papıllomasy vırýsyna (APV) qarsy 11 jastaǵy qyzdarǵa vaksınasıa júrgizilýde. Sonymen qatar, 12-13 jastaǵy qyzdarǵa qosymsha ımmýndaý sharalary da ótkizilip jatyr.
Óńirler arasynda APV-ǵa qarsy vaksınasıa boıynsha Túrkistan oblysy kósh bastap tur. Bul aımaqta 11,1 myńnan astam qyz bala egildi. Shymkent qalasynda – 5,3 myń, Qaraǵandy oblysynda – 4,3 myń, Jambyl oblysynda – 4 myń, Astana qalasynda – 3,7 myńnan astam qyz balaǵa vaksına egildi.
Vaksına alǵandar arasynda ımmýndaýdan keıingi jaǵymsyz áserler tirkelgen joq.
Qazaqstanda ekpeler mektepterdegi medısınalyq kabınetterde ata-analardyń nemese zańdy ókilderdiń kelisimimen júrgiziledi. Qajet bolǵan jaǵdaıda ata-analardyń ótinishi boıynsha tirkelgen jeri boıynsha emhanalarda da vaksınasıa jasalady.
- APV-ǵa qarsy profılaktıkalyq vaksınasıa jatyr moıny obyry jáne basqa da onkologıalyq aýrýlardyń aldyn alýǵa kómektesedi.
- Qazaqstanda jatyr moıny obyry barlyq jastaǵy áıelder arasynda sút bezi obyrynan keıingi ekinshi, al fertıldi jastaǵy (25-44 jas) áıelder arasynda sút bezi obyrynan keıingi ólimniń ekinshi sebebi bolyp tabylady.
Qosymsha jáne senimdi aqparat alý úshin egu.kz saıty sıaqty resmı derekkózderdi, QR Densaýlyq saqtaý mınıstrliginiń Sanepıdbaqylaý komıtetiniń, Ulttyq qoǵamdyq densaýlyq saqtaý ortalyǵynyń jáne densaýlyq saqtaý basqarmalarynyń resmı paraqshalaryn paıdalanýǵa keńes beremiz.
Sondaı-aq, 7701 koll-ortalyǵy jumys isteıdi. Bul ortalyq arqyly APV-ǵa qarsy vaksınasıa jáne basqa da vaksınasıalarǵa qatysty suraqtarǵa jaýap alýǵa bolady.