Netflix-tegi «Joǵalǵan balalar» derekti fılmi 2023 jyly Amazon ný ormanynda oryn alǵan shynaıy oqıǵa negizinde túsirilgen. Bul fılmde bir otbasynyń aman qalý jolyndaǵy keremet oqıǵasy baıandalady, dep habarlaıdy aqshamnews.kz
2023 jyldyń 1 mamyrynda Magdalena Mýkýtýı tórt balasymen birge Kolýmbıanyń ońtústik-shyǵysyndaǵy San-Hose-del-Gavıare qalasyna ushyp barý úshin bir motorly Cessna ushaǵyna otyrady. Ushaqta úsh eresek pen tórt bala bolǵan. Balalardyń eń úlkeni – 13 jastaǵy Leslı, al eń kishisi – nebári 11 aılyq sábı.
Amazonıa ústimen ushyp bara jatqan ushaq ormannyń bir bóligine qulap, apatqa ushyraıdy. Qutqarý jumystaryna Kolýmbıanyń arnaıy áskerı kúshteri men jergilikti taıpalardyń ókilderi jumyldyrylady. Alaıda alǵashqy 15 kúnde izdeýshiler eshqandaı derek tappaı, ný ormandy kezýmen ýaqyt ótkizedi.
Tek 16-kúni qutqarýshylar ormanda on tórt jastaǵy Alehandromen kezdesedi. Ormannan eshqashan shyqpaǵan bul bala olarǵa ushaqtyń qulaǵan ornyn kórsetip, «kók úı» dep ataǵan synyqtardy nusqaıdy. Ushaqta tek eresekterdiń denesi tabylǵanymen, balalardyń iz-túzsiz joǵalǵany anyqtalady.
Balalar tiri bolýy múmkin degen úmitpen qutqarýshylar izdeýdi jalǵastyra beredi. Ushaq qulaǵan jerden bir shaqyrym qashyqtyqtan balanyń sút ishetin bótelkesi, al taǵy bir shaqyrymnan jabaıy jemisterdiń jartylaı tistelgen qabyǵy tabylady.
40 kún ótkennen keıin qutqarýshylar 13 jasar Leslıdi úsh baýyrymen álsiregen kúıinde, ormannyń sý jaǵasynda taýyp alady. Tórt baýyrdyń ormandaǵy bir aılyq ǵajaıyp aman qalýy – Leslıdiń erliginiń aıqyn dáleli.
Leslı apattan keıin baýyrlaryn ormannyń qaýipti ortasynda tiri qaldyrý úshin japyraqtarmen, jabaıy jemistermen tamaqtandyryp, bir aı boıyna qamqorlyq jasaǵan. Qutqarýshylar Leslıden: «Qalaı jol taýyp otyrdyńdar?» – dep suraǵanda, ol:
"Kún saıyn alǵa qaraı júrip otyrdyq. Qutqarýshylar bizdi baıqasyn dep, jolǵa keıbir zattarymyzdy qaldyryp kettik," – dep jaýap bergen.
Bul oqıǵa tek balalardyń aman qalýy týraly emes, sonymen birge adamnyń alǵa umtylý, qaısarlyq pen tabandylyq arqyly qandaı qıyndyqty da jeńe alatynyn dáleldeıdi. 13 jasar Leslıdiń erligi – ómirde tek alǵa qaraı júrý, maqsatqa umtylýdyń shynaıy úlgisi.