Balýanymyz fınalda súrindi
Serbıa astanasy Belgrad qalasynda ótip jatqan kúres túrlerinen álem chempıonatynda Jámıla Baqbergenova áıelder kúresinen kúmis aldy, dep habarlaıdy Almaty-akshamy.kz QazAqparatqa silteme jasap.
Jámıla 72 keli salmaqta jartylaı fınalda rýmynıalyq Aleksandra Angeldi jeńse, shırek fınalda ózbekstandyq Svetlana Oknazarovany qapy qaldyrdy.
Fınalda ol qatelikke boı aldyryp qoıdy. Nátıjesinde qarsylasyna ese jiberip, kúmis júldeni qanaǵat tutty.
Jámıla Baqbergenova 1996 jyly 6 qańtarda dúnıege kelgen. Eresekter arasynda 2021 jyly Norvegıa astanasy Oslo qalasynda ótken álem chempıonatynda kúmis júldeger atanǵan bolatyn.
Ol Azıa chempıonatynda 2020, 2022 jyldarda chempıon atansa, 2021 jyly kúmis, 2019 jyly qola aldy.
Atalǵan salmaqta úshinshi oryn rýmynıalyq Aleksandra Angel men japonıalyq Masako Fýrýıtıǵa buıyrdy.
Buǵan deıin elimizdiń áıelder quramasynan Svetlana Ankıcheva (50 keli), Juldyz Eshimova (53 keli), Marına Sedneva (55 keli), Emma Tısına (57 keli), Dıana Kaıýmova (59 keli), Aıaýlym Qasymova (62 keli), Elena Shalygına (65 keli), Mádına Baqbergenova (68 keli), Gúlmaral Erkebaeva (76 keli) synǵa túsip, jarystyń túrli satysynda qarsylastaryna ese jiberip qoıdy.
Eske salsaq, budan buryn grek-rım kúresinen Aıdos Sultanǵalı qola júldeger atandy.
Sondaı-aq, erkin kúresten Azamat Dáýletbekov qola júldege talasady.