Ábý Dabıde ótip jatqan «Toleranttylyq úshin dúnıejúzilik úkimetterdiń ınkýbatory» forým memleketter toleranttylyq, qoǵamdyq kelisim men turaqtylyq úshin ne isteı alady, deskrımınasıa men tózimsizdikpen qalaı kúresemiz degen suraqqa jaýap izdeıdi. Birneshe eldiń salalyq vedomstvolary qatysqan jıynda Aqparat jáne qoǵamdyq damý mınıstri Darhan Qydyráli sóz sóıledi, dep habarlaıdy Almaty-akshamy.kz.
«Ózderińizge belgili, XXI ǵasyrdaǵy álem jurtshylyǵyn dúrliktirip otyrǵan syn-qaterlerge toıtarys berýde toleranttylyq, adamı baýyrlastyq, tatýlyq qundylyqtary erekshe mánge ıe. Biz bul qasterli qundylyqtyń qadyr-qasıeti men mán-mańyzyn kúni keshe dúnıe júzin áp-sátte sharpyp ótken koronavırýs indeti kezinde baıqadyq degen oıdamyn. Bir qoǵamda ómir súre otyryp, júris-turysy shektelip, vırtýaldy baılanysqa túsken kezde, tanys ta beıtanys adamdar ózara túsinistik tanyta otyryp qana osy qıyndyqty eńserdi», - dedi mınıstr.
Sondaı-aq mınıstr Qazaqstandaǵy etnosaralyq jáne konfesıaaralyq kelisimdi nyǵaıtý úshin atqarylyp jatqan jumystar týraly aıtty.
«Birikken Ulttar Uıymynda basqarýshy qyzmet atqarǵan Prezıdent Qasym-Jomart Kemeluly Toqaev álemniń kún tártibindegi ózekti máseleler men eldegi tynyshtyqtyń turaqty bolýyna únemi nazar aýdaryp otyr. Buǵan qosa, Qazaqstan Álemdik jáne dástúrli din kóshbasshylarynyń dıalog alańyna aınaldy. Din qaıratkerleriniń basyn qosatyn Álemdik jáne dástúrli din lıderleriniń Sezi Astanada jetinshi ret ótkizildi», - dedi D.Qydyráli.
Sondaı-aq mınıstr toleranttylyqty nasıhattaýdaǵy mass medıanyń mańyzy erekshe ekenine toqtaldy.
«Medıada arazdyq tiliniń qoldanylmaýyn qadaǵalap, kerisinshe, eldi birlikke, tatýlyqqa úndeý, halyqty rýhanı jaqyndastyrýda aqparat quraldarynyń roli zor. Búgingi konferensıa da osy maqsattyń oryndalýyna óz úlesin qosady dep senemin jáne uıymdastyrýshylarǵa alǵys aıtamyn», - dedi Darhan Qydyráli.
Aıta keteıik, Birikken Arab Ámirlikteriniń astanasy Ábý Dabıde «Toleranttylyq úshin dúnıejúzilik úkimetterdiń ınkýbatory» atty forým ótip jatyr. Jıynǵa Ámirliktiń Toleranttylyq jáne qatar ómir súrý mınıstri Nahaıan ben Mýbarak Ál Nahaıan qatysty.