Qaladaǵy kórme 2 aptaǵa sozylady
Abaıdyń ózi ustaǵan dombyrasy, kise belbeýi men Qunanbaıdyń Mekkege kıgen taqıasy. Osyndaı qundy jádigerler búgin uly aqynnyń týǵan jeri Semeıden ákelinip, Almaty mýzeıine qoıyldy, dep habarlaıdy Almaty-akshamy.kz Almaty.tv-ge silteme jasap.
Eksponattardy kópshilik «Abaı murasy – halyq qazynasy» atty kóshpeli kórmede tamashalaı alady. Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq mýzeı-qoryǵy almatylyqtar úshin 50-den asa tarıhı jádiger alyp kelipti.
Abaı týǵan, jer kindigi – Jıdebaıdan búgin arnaıy Almatyǵa jyljymaly kórme keldi. Shyǵystan alǵash ret at aryltqan kórmeni qala ákimdigi men zıaly qaýym ókilderi saltanatty túrde ashyp berdi.
«Jastarǵa kerek. Óıtkeni bul kisilelerdiń sózi, oıy, tereńdigi biz úshin aýadaı qajet. Sondyqtan men óte búgin baqyttymyn. Osynsha adam Jıdebaıdyń rýhanı sýatynan dám tatyp jatyr», – dedi jazýshy, Halyqaralyq abaı klýbynyń prezıdenti Rollan Seısenbaev.
Semeıden aqynnyń ózi paıdalanǵan zattary men kitaptary, qoljazbalary, jalpy alǵanda 52-ge tarta jádiger ákelinipti.
Úsh ishekti dombyra men sybyzǵy Abaıdyky desedi. Bul qoıylǵany kóshirmesi eken. Tupnusqasy Semeıde. Al mynaý aqynnyń kise belbeýi. Bul teńdessiz jádigerlerdi kezinde Abaı óziniń dosy Nıkolaı Dolgopolov arqyly 1885 jyly Semeıdegi ólketaný mýzeıine tapsyrtqan eken. Keıinnen 1940 jyly Abaı mýzeıi ashylyp, sol jaqqa ótkizilipti.
Budan bólek Abaı mýzeıinen aqynnyń ekinshi jary Áıkerimniń qobdıshasy da jetken. Aǵash pen áshekeı tastardan jasalǵan tupnusqadaǵy sandyqsha áýelgi kúıin áli joǵaltpapty. Al ákesi Qunanbaıdyń naq ózinen eki jádiger qalǵan desek, sonyń biri – jeke móri, ekinshisi – taqıasy.
«Sonymen qatar eń bir qundy jádigerimiz Abaıdyń ákesi Qunanbaıdyń Mekkege barǵanda kıgen taqıasy. Búkil halyq Semeıge bara bermeıdi ǵoı. Sondyqtan da bul qala turǵyndaryna Abaı elimen tanysýǵa bolady», – dedi Abaıdyń «Jıdebaı-bórili» memlekettik tarıhı-mádenı jáne ádebı-memorıaldyq mýzeı-qoryǵynyń» jetekshi ǵylymı qyzmetkeri Nurjan Boranbaev.
«Abaıdyń mýzeıi Almaty qalasynyń mýzeıine alǵash ret kelýi. Kórme 2 aptaǵa sozylady. Barlyq qala turǵyndary men qonaqtaryn osy kórmeni tamashalaýǵa shaqyramyz. Kúndelikti tańǵy 10.00-den 19.00-ge deıin esigimiz aıqara ashyq», – dedi «Almaty qalasy mýzeıler birlestigi» KMQK dırektory Lázzát Saǵyndyqova.
Kóshpeli kórme buǵan deıin Nur-Sultan, Oral, Qaraǵandy, Petropavl qalalarynda uıymdastyrylypty. Aldaǵy ýaqytta ózge de óńirlerde jalǵaspaq.