QR Parlamenti Senatynyń tóraǵasy Máýlen Áshimbaev qazaqstandyqtardy Abaı kúnimen quttyqtady, dep habarlaıdy Almaty-akshamy.kz.
«Qurmetti dostar!
Barshańyzdy Abaı kúnimen shyn júrekten quttyqtaımyn!
Abaı – tutas halqymyzdyń rýhanı temirqazyǵyna aınalǵan uly oıshyl. Ulttyq bolmysymyz ben adamı damýymyzǵa baǵdar bolǵan biregeı tulǵa. Sondyqtan Memleket basshysy Qasym-Jomart Kemeluly Toqaevtyń @tokayev_online bastamasymen 10 tamyz «Abaı kúni» dep belgilengen bolatyn.
Uly ǵulamanyń murasy – qansha ýaqyt ótse de syny ketpeıtin, syry taýsylmaıtyn baǵaly qazyna. Abaıdyń ózi HİH ǵasyrda ómir súrse de, jańa zamannyń adamymen rýhanı úndes tulǵa ekeni sózsiz. Óıtkeni durys qundylyqtarǵa taban tiregen, bilikti, otanshyl, janashyr azamat bolyp qalyptasý úshin oıshyldyń «Tolyq adam» tujyrymyn baǵdar etý qazirgi tańda da asa mańyzdy.
Prezıdentimiz aqyndy ulttyq sanany jańǵyrtýǵa zor yqpal etken rýhanı reformator dep ataǵany belgili. Shyn máninde, Abaı halqymyzdyń bitim-bolmysyn zerdelep, tereń uǵynyp, ony ýaqyt talabyna saı shyńdaýdyń formýlasyn usyndy. Sonymen birge, adamı asyl qasıetterdi dáriptep, álemdik oıdyń bıigine kóterildi. Sondyqtan Abaıdyń murasy ultymyzben qosa jahan jurty úshin de qundy ári qadirli.
Munyń bári aqynnyń asyl murasyn elimizben birge shetelderde de dáripteýdiń mańyzy zor ekenin kórsetedi. «Abaı kúni» – osy maqsatty kózdeıtin rýhanı mereke. Sondyqtan álemniń qaı túkpirinde júrsek te oıshyldyń ósıetteri men óleńderinen taǵylym alyp, ony nasıhattaǵanymyz abzal.
Abaıdyń ulaǵaty – árbir azamatymyz umtylýǵa tıis bıik beles. Sol bıikte barshamyzdyń basymyz biriksin. Elimiz aman, jurtymyz tynysh bolsyn!», delingen Senat tóraǵasynyń quttyqtaý habarlamasynda.