Abaı mereıtoıy aıasynda úsh irgeli eńbek jaryq kórdi, - dep habarlaıdy Aqshamnews.kz tilshisi.
Uly aqyn Abaıdyń 180 jyldyǵy aıasynda bes týyndy jaryq kórdi. Kitaptar Aqberen Elgezektiń "Abaı" baspasynan jaryq kórgen, tusaýy 9 tamyzda Semeıdegi Shákárim ýnıversıtetinde ótken "Adamzattyń Abaıy: Rýhanıat, parasat, tanym" halyqaralyq ǵylymı-tájirıbelik konferensıasynyń aıasynda kesilgen.
"Abaıdyń aýdarma mektebi" atty ǵylymı eńbekte qazaqtyń kásibı kórkem aýdarmasynyń bastaýy, jalǵyz ózi tutas bir álem jasap, shyǵarmashylyqpen aınalysqan nebári jıyrma jyldyń ishinde qazaqtyń tilin de, kórkemdik, etıkalyq tanymyn da kúrt ózgertip, buryn-sońdy túrik jurty jetpegen bıikke kótergen Abaıdan taǵylym alǵan Shákerim Qudaıberdiuly, Áset Naımanbaıuly, Ýáıis Shondybaıuly, Turaǵul Abaıuly, Danıal Ysqaqovtardyń kórkem aýdarmalaryna ǵylymı turǵyda teorıalyq, tekstologıalyq taldaý jasalǵan. Shákerim, Turaǵul, Danıaldyń ómirlerine, qoǵamdyq qyzmetterine qatysty arhıvte saqtalǵan tyń derekter men túpnusqa qoljazbalar berilgen.
"Danıal Ysqaqov shyǵarmalary" jınaǵy – qazaqtan shyqqan tuńǵysh qarjyger, aǵartýshy, aýdarmashynyń ádebı murasyn tutas qamtyǵan alǵashqy basylym. Ol – Kákitaı Ysqaqovtyń uly, Abaıdyń tuńǵysh jınaǵyn Sankt-Peterbýrgten Shyńǵystaýǵa jetkizgen tulǵa.
Úshinshi eńbek – "Sheıit" kitaby. Munda uly gýmanıs, oıshyl Shákerim Qudaıberdiulynyń ómiriniń sońǵy kezeńi, qazaǵa ushyraýy, oǵan qatysty muraǵat derekteri men estelikter salystyrmaly zertteý arqyly berilgen.
Al "Halıolla" atty kitaptyń avtory - Áset Medeýhanuly. Al Ahat Shahkárimulynyń "Jalynǵa malǵan júregin" kitabyn qurastyrýǵa aqyn Mereı Qart jáne Jańyl Ádilbekqyzy atsalysqan.