Memlekettik qoldaý sharalarynyń arqasynda 2022 jyly ataýly áleýmettik kómek alǵan 100,4 myń otbasy 2023 jyly kedeılik jaǵdaıynan shyqty.
Bul týraly Eńbek jáne halyqtty álýmettik qorǵaý mınıstrligi málimdedi, dep habarlaıdy Almaty-akshamy.kz.
Buryn habarlanǵandaı, AÁK-niń negizgi maqsaty – aqshalaı tólem túrinde qoldaýdy júzege asyrý jáne otbasynyń eńbekke qabiletti múshelerin jumyspen qamtýǵa járdemdesýdiń belsendi sharalaryna tartý arqyly otbasyn qıyn ómirlik jaǵdaıdan shyǵarý.
AÁK mynalardy kózdeıdi:
- tabysy óńirlik eń tómengi kúnkóris deńgeıiniń 70% - nan aspaıtyn azamattarǵa toqsan saıyn áleýmettik kómek taǵaıyndaý;
- Tabysy az otbasylardaǵy 1 jastan 6 jasty qosa alǵandaǵy ár balaǵa 1,5 AEK (5 175 teńge) mólsherinde aı saıynǵy qosymsha tólem berý;
- jumysqa ornalastyrý, óz isin ashýǵa nıetti otbasylarǵa granttar berý, biliktilikti arttyrý kýrstaryna jiberý (qajet bolǵan jaǵdaıda) jáne basqalar arqyly jumyspen qamtýǵa járdemdesý.
2022 jyly AÁK alýshylar sany 141,5 myń otbasyn (728,7 myń adam) qurady, osy jyldyń 1 tamyzynda 102,7 myń otbasy AÁK (538,9 myń adam) aldy.
Óńirlik bóliniste bıylǵy 1 tamyzdaǵy jaǵdaı boıynsha AÁK alýshylardyń eń kóp sany Túrkistan oblysynda – 25,1 myń otbasy nemese 24,4%, Shymkent qalasynda – 11,1 myń otbasy nemese 10,8%, Qyzylorda oblysynda – 8,8 myń otbasy nemese 8,6%, Almaty oblysynda – 8,6 myń otbasy nemese 8,4%, Jambyl oblysynda – 7,2 myń otbasy nemese 7%, Jetisý oblysynda – 6,2 myń otbasy nemese 6% tirkelgen.
AÁK taǵaıyndaýlarynyń eń az sany Ulytaý oblysynda – 459 otbasy nemese 0,4%, Atyraý oblysynda – 903 myń otbasy nemese 0,9%, Soltústik Qazaqstan oblysynda – 1,4 myń otbasy nemese 1,3%, Qaraǵandy oblysynda – 1,7 myń otbasy nemese 1,6% tirkelgen.
AÁK alýshylardyń qurylymynda basym kópshiligi balalardyń úlesinde – 65,9% nemese 355,2 myń adam, 14,9% nemese 80,1 myń adam – jumys isteıtin azamattar; 13% nemese 70 myń adam – balalarǵa, qarttarǵa, múgedektigi bar adamdarǵa kútim jasaıtyn adamdar; qalǵan 6,2% – azamattardyń basqa sanattaryna tıesili.
Qabyldanǵan sharalardyń, ásirese jumyspen qamtýǵa járdemdesýdiń belsendi sharalaryna tartýdyń nátıjesinde 2022 jyly ataýly áleýmettik kómek alǵan 141,5 myń otbasy, óz ómirin qalypqa keltirý úshin berilgen múmkindikti sátti paıdalanǵan 100,4 myń otbasy kedeılik jaǵdaıynan shyqty.
Solardyń biri ońtústik óńirden kóship kelgen, qazir Soltústik Qazaqstan oblysy Qyzyljar aýdanynyń turǵyny Aqnıet Altynbaıdyń otbasy. Erli-zaıyptylar mal sharýashylyǵymen aınalysýǵa sheshim qabyldady, osy maqsatta olar mıkrokredıt aldy.
«Bizdiń kámeletke tolmaǵan tórt balamyz bar, biz AÁK alýshylar qatarynda bolǵan edik. Kúıeýim mal sharýashylyǵyn damytyp, ózim dekrettik demalysta júrgen kezimde úıde pisiriletin un ónimderi men kondıterlik ónimderdi daıarlaýmen aınalysyp, otbasylyq merekeler men meıramdarǵa tapsyrystar qabyldadym. Keıinnen men orta mektepke áleýmettik pedagog retinde jumysqa ornalastym. Nátıjesinde búginde otbasymyz AÁK alýshylar qatarynda emes», – dedi Aqnıet Altynbaı.