Qysqy konkýrs qorytyndysy boıynsha magıstratýraǵa bilim granttary ıegerleriniń tizimi jarıalandy. Memlekettik granttardy 945 qazaqstandyq jeńip aldy, dep habarlaıdy Almaty-akshamy.kz QR Bilim jáne ǵylym mınıstrligine silteme jasap.
Onyń ishinde ǵylymı-pedagogıkalyq magıstratýraǵa 837 adam, beıindik magıstratýraǵa 108 adam oqýǵa tústi. Úmitkerlerdiń arasynda «Injenerlik, óńdeý jáne qurylys salalary», «Jaratylystaný ǵylymdary, matematıka jáne statısıka», «Áleýmettik ǵylymdar, jýrnalısıka jáne aqparat» syndy baǵyttar suranysqa ıe boldy.
Bıyl Bilim jáne ǵylym mınıstri Asqat Aımaǵambetovtiń tapsyrmasy boıynsha mınıstrlik magıstratýra men doktorantýraǵa granttar berý úshin konkýrsty eki ret dástúrli túrde jazda jáne alǵash ret qosymsha qysta uıymdastyrdy. Osylaısha, túrli sebepterge baılanysty magıstratýraǵa túse almaǵan úmitkerler bilim berý granttaryn taǵaıyndaý konkýrsyna qatysýǵa ekinshi múmkindik aldy.
«Memlekettik granttar respýblıkalyq konkýrstyq komısıa otyrysynyń qorytyndysy boıynsha berildi. Onyń quramyna memlekettik organdardyń, úkimettik emes uıymdardyń ókilderi, jýrnalıser, Qazaqstan stýdentter alánsy men «Otandastar» qorynyń ókilderi kirdi. Otyrysta komısıa barlyq qatysýshynyń nátıjesin qarady. Konkýrstyq irikteý rásimi tolyǵymen avtomattandyrylǵan. Magıstratýrada oqý úshin bilim granttary úmitkerlerdiń balyna sáıkes konkýrstyq negizde berildi», – dep atap ótti QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev.
Memlekettik magıstratýra bilim granttary ıegerleriniń tizimi mınıstrliktiń Telegram paraqshasynda jáne Ulttyq testileý ortalyǵynyń saıtynda jarıalanǵan.
Barlyq grant ıegerleri 10 qańtarǵa deıin qujattaryn ýnıversıtetterdiń vırtýaldy qabyldaý komısıalary arqyly tapsyrady. Oqý joǵary oqý oryndarynyń akademıalyq kúntizbesine sáıkes bastalady.
Aıta keteıik, irikteý sapasyn jaqsartý úshin aqyly bólimge magıstratýraǵa túsý úshin shekti bal kóterildi. Memlekettik bilim berý tapsyrysy boıynsha jáne aqyly negizde ǵylymı-pedagogıkalyq magıstratýraǵa túsý úshin shekti bal – 75, beıindi magıstratýraǵa túsý úshin 50 bal.