Úkimet otyrysynda Qazaqstannyń bıylǵy qańtar-qyrkúıek aılaryndaǵy áleýmettik-ekonomıkalyq damý jáne respýblıkalyq búdjettiń atqarylý qorytyndylary qaraldy.
Ulttyq ekonomıka mınıstri Álibek Qýantyrov esepti kezeńde el ekonomıkasynyń ósý qarqyny 4,7% bolǵanyn baıandady. Naqty sektordaǵy oń dınamıka 3,7%, qyzmet kórsetý salasynda 5,1%-dy qurady. Ósý qarqyny joǵary salalar: qurylys – 12,6%, saýda – 10%, sondaı-aq aqparat pen baılanys – 8,4%, dep habarlaıdy Almaty-akshamy.kz Primeminister.kz-ke silteme jasap.
Negizgi kapıtalǵa salynǵan ınvestısıalardyń ósý qarqyny 12,1% boldy. Investısıalar aǵyny artqan salalar: kólik jáne qoıma – 59,4%, saýda – 37,5%, bilim – 23,7%, aýyl sharýashylyǵy – 12,9%, ónerkásip – 8,2%, onyń ishinde taý-ken ónerkásibi – 4,3%.
Qańtar-tamyzda respýblıkanyń syrtqy saýda aınalymy 4,2%-ǵa ósip, $91,1 mlrd-ty qurady. Eksport $51,2 mlrd-qa jetti, onyń ishinde óńdelgen taýarlar – $16,2 mlrd, ımport – $39,8 mlrd. Jalpy Qazaqstannyń oń saýda balansy $11,4 mlrd-qa teń.
Premer-Mınıstrdiń orynbasary – qarjy mınıstri Erulan Jamaýbaev 9 aıdyń qorytyndysy boıynsha memlekettik búdjetke 13,8 trln teńge kiris túskenin, jospar 97%-ǵa oryndalǵanyn málimdedi. Respýblıkalyq búdjet 9,2 trln teńgege, jergilikti búdjetter 4,7 trln teńgege tolyqty. Sol kezeńde memlekettik búdjettiń shyǵystary 99,3%-ǵa, respýblıkalyq búdjettiń shyǵystary 98,6%-ǵa, jergilikti búdjetterdiń shyǵystary 99,5%-ǵa oryndaldy.
Úkimet basshysynyń aıtýynsha, 9 aıdyń qorytyndysy boıynsha Abaı, Batys Qazaqstan, Qyzylorda oblystary men Almaty jáne Shymkent qalalarynda barlyq negizgi kórsetkishtiń ósýi tirkeldi. Qabyldanǵan sharalardyń nátıjesinde ınflásıa deńgeıi 11,8%-ǵa deıin tómendedi.
«Jyldyń sońyna deıin 2,5 aı qaldy. Ekonomıkanyń barlyq salasynda ósý qarqynyn arttyrý úshin naqty sharalar qabyldaý kerek», — Premer-Mınıstr.
Sonymen qatar jaýapty memlekettik organdar men ákimdikterge azyq-túlik taýarlarynyń baǵasyn turaqtandyrý jáne otandyq azyq-túlik óndirisin yntalandyrý boıynsha jumysty jalǵastyrý tapsyryldy.
«Sheteldik jáne otandyq ınvestorlardy tarta otyryp, shıkizattyq emes sektorlarda, onyń ishinde óńdeý ónerkásibi, aýyl sharýashylyǵy, kólik, logıstıka, IT, týrızm jáne basqa salalarda ınvestısıalyq jobalardy iske asyrýdy jedeldetýge basa kóńil bólý kerek», — dedi Álıhan Smaıylov.
Qorytyndylaı kele, Úkimet basshysy sondaı-aq shaǵyn jáne orta bıznesti damytý úshin qolaıly jaǵdaı jasaý, kásipkerlik bastamalardy qoldaý, jańa jumys oryndaryn qurýdy yntalandyrý boıynsha tıisti sharalardy odan ári jalǵastyrý qajettigin aıtty.