Jetisý oblysy Panfılov aýdanynyń turǵyny Baqtybala Qasymova 35 jyldan beri salaýatty ómir saltyn ustanady, - dep habarlaıdy aqshamnews.kz tilshisi 24.kz-ke silteme jasap.
Aýyldyqtarǵa naǵyz úlgi kórsetip otyr. Baqtybala apa tańmen talasa turyp, aýyl syrtyndaǵy jotaǵa júgirip shyǵady. Babyn joǵaltpaıyn dep, salaýatty ómir saltyn ustanýdy kúndelikti ádetke aınaldyrǵan.
"Júgirmesem, qımyldamasam aýyryp qalamyn. Tura almaı qalamyn. Balalarym "júgirme, qasqyr bar" deıdi. Qaramaı júgire beremin. Ol densaýlyq úshin ǵoı. Men sıaqty 85-ke kelgen adam joq. Kóbi qaıtys boldy. Bir-eki adam ǵana bar. Olar taıaqpen áreń júredi. Onyń janynda júgirip, ótip ketemin. Adam umtylý kerek. Nıet jasaý kerek. Jattyǵý jasaýshy edim, kilem joq qoı. 50 ret otyryp-turamyn, osy kúni qınalmastan 25-20 jasaı salamyn", - deıdi "Altyn alqa" ıegeri.
Seksenniń seńgirine shyqqan áje 20 jyldan asa balabaqsha meńgerýshisi bolǵan. Jetekshilik etken ujymymen birge búldirshinderdi eńbekke, bilimge baýlydy. Bala tárbıeleý arqyly Baqtybala apa tutas aýyldyń ardaqty anasyna aınaldy.
"Osy aýyldaǵy orta býyn, aǵa býynnyń tárbıesinen ótken. Sol kisiniń jolyn basyp kele jatyrmyz. Balalarǵa tárbıe berip otyr. Búginde bul jerde 60 balamyz bar. Úsh tobymyz bar. Jumysshylarymyz bir ujym bolyp jumys istep jatyr", - deıdi balabaqsha tárbıeshisi Kenjegúl Baımuqasheva.
Bul isti Baqtybala apanyń qyzy men kelinderi jalǵastyryp jatyr. Al, ózi ájeler ansambliniń quramynda kópshilik mádenı sharalarǵa qatysyp, aýyldyń qoǵamdyq ómirine belsene aralasady.
"Búkil aýyldaǵy jastarǵa úlken ónege. Óziniń bilgen aqylyn aıtyp otyrady. Apamyz salaýatty ómir saltyn ustanady. Odan bólek qazaqy qolónerdi qoldap, dáriptep otyr", - deıdi Taldy aýyldyq okrýginiń ákimi Qýandyq Áshirjanov.
Taldy aýylyna kelin bolyp túsken Baqtybala apa Nurǵazy atamen jarty ǵasyr birge ǵumyr keshti. Ekeýi on bir bala ósirip, qyzyn-qıaǵa, ulyn uıaǵa qondyrdy.
"Ata-anamyzdyń tárbıesiniń arqasynda osy hálge jettik. Oqydyq, bilim aldyq, qazir eńbek etip jatyrmyz. Ata-anamyz osy aýylda eńbek etip, el syılaǵan, búkil aýyl syılaǵan azamattar. Ákem bolmasa da, ornyn joqtatpaı, áli basymyzdy qosyp, qara shańyraqqa jınap, batasyn berip, tilekterin aıtyp otyrady", - deıdi Taldy aýyldyq okrýginiń ákimi Qýandyq Áshirjanov ájeıdiń uly Erǵazy Eshqaev.
Qımyl qozǵalysy shıraq áje búginde beınetiniń zeınetin, ul-qyzynyń qyzyǵyn kórip, nemere-shóbereleriniń ystyq yqylasyna bólenip otyr.