8 naýryzǵa deıin eki-úsh kún bar. Degenmen apta boıy qyzdar qaýymy úshin merekeni atap ótý, syılyqtar alý naýqany bastalyp ketti
Gúl, átir, shokolad, áshekeı, baǵaly zat. Osy tizimnen basqa názik jandylar qaýymyna ne syılaryńyzdy bilmeı júrgen bolsańyz, onda syılyq izdegen adamǵa paıdaly bolar keńes usynamyz,
Elorda.info saıty usynýǵa bolatyn birneshe syılyq nusqalaryn usynypty.
Aýa ylǵaldandyrǵysh
Úıge arnalǵan sapaly aýa ylǵaldandyrǵysh – adamnyń terisi men ókpesi úshin eń paıdaly gadjetterdiń biri. Bul, ásirese, jyldyń sýyq mezgilinde asa qajet: qurylǵy aýanyń ylǵaldyq deńgeıin 30-50% aralyqta ustap turýǵa kómektesedi. Ylǵaldandyrǵysh satyp alarda onyń qanshalyqty aýdandy ylǵaldandyrýǵa kúshi jetetinin eskerińiz: ókinishke qaraı, shaǵyn aýa ylǵaldandyrǵyshtar úlken aýmaqtaǵy aýanyń ylǵaldyq deńgeıin joǵarylata almaıdy.
Medısınalyq chek-ap sertıfıkaty
Sapaly klınıkalardaǵy chek-ap arzan turmaıdy, biraq onyń adam boıyndaǵy qanshama aýrýdyń aldyn alyp, dárýmender defısıtin anyqtaıtynyn eskersek, kez kelgen qyz-kelinshekke budan asqan paıdaly syılyq joq. Qazirgi tańda jatyr moıny isigi men omyraý qaterli isigi – álem boıynsha (onyń ishinde Qazaqstanda da) eń jıi kezdesetin ári joǵary qarqynmen órship bara jatqan onkologıalyq aýrý. Jaqynyńyzdy osy sumdyq dıagnozdardan qorǵaǵyńyz kelse, chek-ap sertıfıkaty – naǵyz siz izdegen syılyq.
Shańsorǵysh-robot
Úı tazalaý – kóbine áıelderdiń ıyǵyna túsetin aqy tólenbeıtin jumys. Úı ishinde óz betinshe jyljyp, jolyndaǵy shań-tozańdy jınap júretin shańsorǵysh-robot – kez kelgen qyz-kelinshektiń ýaıymyn azaıtatyn shynymen de paıdaly gadjet. Árıne, ol arzan turmaıdy, biraq sonyń kómegimen qanshama ýaqytty únemdeýge bolatynyn oılańyzshy. Aıtpaqshy, mundaı qurylǵylardy, ásirese, mysyǵy bar hanymdar sózsiz unatady.
SPA-salonǵa sertıfıkat
Keıde taýardan góri paıdaly qyzmet túrin de syılaýǵa bolady. Kúni boıy kompúterdiń aldynda otyratyn qyz-kelinshekterdiń arqasyna tuz jınalyp, qımyl-qozǵalysqa yńǵaısyzdyq týǵyzatyny belgili. Sondaıda 2-3 saǵattyq SPA-baǵdarlamalar onyń boıyn balbyratyp, ózin-ózi jeńil sezinýine kóp kómektesedi. Sondaı-aq mundaı syılyq – erteli-kesh bala kútimimen úıde otyrǵan kelinshekter úshin de taptyrmas tartý.
Konsertke bılet
Súıikti ánshisiniń konsertine nemese ádemi merekelik keshke bılet áperseńiz de, ony kól-kósir qýanyshqa keneltesiz. «Eń jaqsy syılyq – áser» degen sóz bar. Jandy daýysty konsertten alǵan áseri onyń esinde uzaq jyldar boıy saqtalary daýsyz. Onyń ústine, 8 naýryzǵa qaraı konsertter legi de artady.
Bútı-dúken sertıfıkaty
Teri kútimine arnalǵan quraldardy paıdalanbaıtyn qyz-kelinshek joq. Al sapaly kútim quraldarynyń baǵasy sharyqtap turǵanyn eskersek, mundaı sertıfıkat kóp arýdyń kóńilinen shyǵary anyq. Alaıda bul tusta mynany eskerýińizdi suraımyz: eger siz qyzyńyzdyń/jubaıyńyzdyń/apa-qaryndasyńyzdyń naqty qandaı brend ónimderin turaqty qoldanatynyna kózińiz jetse ǵana sol dúkenniń sertıfıkatyn syılaýǵa bolady.
Symsyz qulaqqap
Qazirgi tańda symsyz qulaqqaptar qanshalyqty qajetti ári paıdaly dúnıe ekenin symsyz qulaqqaby barlar ǵana tolyqtaı túsinedi. Symsyz qulaqqap arqyly ártúrli sharýamen (meıli sportpen) aınalysyp jatyp-aq mýzyka, podkast tyńdaýǵa, qońyraýǵa jaýap berýge bolady. Qulaq pen gadjettiń ortasyn jalǵap turatyn symnyń joqtyǵy sizdiń qımyl-qozǵalysyńyzǵa kádimgideı erkindik beredi.
Bos ýaqyt
Iá-ıá, biz qatelespedik. Bos ýaqyt ta – keıde áıelder eń qatty qalaıtyn dúnıe. Eger jubaıyńyz nemese apa/qaryndasyńyz erteli-kesh kishkentaı balalarymen úıde otyrsa, janyna baryńyz da, gúlińizdi usynyp turyp: «Men balalardy úsh-tórt saǵatqa alyp qalaıyn, sen syrtqa shyǵyp, qydyryp kele ǵoı» deńiz. Qaltasyna 15-20 myń teńge salyp jiberseńiz tipten tamasha! Shopıng jasaı ma, qurbylarymen dámhanaǵa baryp, áńgime-dúken quryp qaıta ma, áıteýir, álgi ýaqytty barynsha ózine arnasyn. Úıge oralǵanda, onyń bal-bul janǵan júzi men alǵysqa toly kózi sizdiń syılyǵyńyzdyń qanshalyqty paıdaly bolǵanyn bildirse kerek.