Bul stıpendıa mádenıet pen óner qaıratkerlerine, shyǵarmashyl tulǵalarǵa beriledi.
Memlekettik keńesshi Erlan Qarın Astana jáne Almaty qalalarynda zıaly qaýym ókilderimen kezdesip, 2022 jylǵy mádenıet salasyndaǵy memlekettik stıpendıany saltanatty tabystaý rásimine qatysty, dep habarlaıdy Almaty-akshamy.kz Aqordaǵa silteme jasap.
Memlekettik stıpendıa mádenıet pen óner qaıratkerlerine, shyǵarmashyl tulǵalarǵa jáne jastarǵa elimizdiń rýhanıatyn qalyptastyrýǵa, damytýǵa qosqan úlesi úshin beriledi.
Bıyl 75 adam memlekettik stıpendıa ıegeri atandy. Olardyń qatarynda Oljas Súleımenov, Myrzataı Joldasbekov, Dýlat Isabekov, Tólen Ábdikuly, Smaǵul Elýbaı, Kúlásh Ahmetova, Hanbıbi Esenqaraqyzy, Aqushtap Baqtygereeva sekildi kórnekti aqyn-jazýshylar, Asanáli Áshimov, Sábıt Orazbaev, Tuńǵyshbaı Jamanqulov sıaqty óner qaıratkerleri bar.
Sonymen qatar, Erlan Júnis, Samal Eslámova, Farhat Moldaǵalı jáne taǵy da basqa jas daryndarǵa qoldaý kórsetildi.
Erlan Qarın sońǵy jyldary elimizde júzege asyrylyp jatqan reformalar jaıyn jan-jaqty baıandady. Ásirese, qoǵamdyq-saıası, áleýmettik jańǵyrý jumystaryn atap ótti. Budan bólek, memleket tarapynan ádebıet pen ónerdi qoldaýǵa qatysty atqarylǵan bastamalar jaıynda málimet berdi.
Memlekettik keńesshi 2023 jyly rýhanıat, ádebıet pen óner baǵytyndaǵy mańyzdy datalardyń kóp ekenin aıta kelip, zıaly qaýym ókilderin bıyl qolǵa alynatyn jumystardyń jaı-japsarymen tanystyrdy.