Ótinimderdi qabyldaýdyń jańa kezeńi bıyl qarashada bastalady, dep habarlaıdy aqshamnews.kz
Daǵdarysqa qarsy sharalar aıasynda Qazaqstanda sýbsıdıalanǵan turǵyn úı baǵdarlamalaryn qoldaýdy jalǵastyrý týraly sheshim qabyldandy. Bul maqsatta "Naýryz" jáne "Naýryz jumysker" ıpotekalyq baǵdarlamalaryna qosymsha 500 mlrd teńge bólindi.
"Krysha" portalynyń habarlaýynsha, baǵdarlamalar boıynsha ótinim qabyldaýdyń jańa kezeńi 2025 jyldyń qarashasyna josparlanǵan, biraq oǵan qatysý sharttary keıinirek habarlanady.
"Qazir onyń mehanızmderi oılastyrylyp jatyr: Jańa konkýrsqa ótinimder qabyldaı bastaımyz nemese naýryz aıynda qatysqan, biraq sharttarǵa saı kelmegenderge nesıe beremiz", - dedi "Otbasy Banki" AQ basqarma tóraıymy Lázzat Ibragımova.
Aıta ketý kerek, baǵdarlamaǵa qatysatyn qurylys salýshylar aldaǵy úsh jylda salynyp jatqan páterleriniń baǵasyn osy deńgeıde ustap turý týraly kelisimderge qol qoıady.
Esterińizge sala keteıik, "Naýryz" jáne "Naýryz jumysker" baǵdarlamalarynyń sharttary tómendegideı:
7 paıyzdyq mólsherleme – halyqtyń áleýmettik osal toby sanatyndaǵy azamattar úshin, basqa qazaqstandyqtar úshin mólsherleme – 9 paıyz;
Bastapqy jarna: árlengen páterler úshin 10 paıyz, jóndeýsiz satyp alynatyn páterler úshin 20 paıyz ;
Nesıe somasy: Almaty men Astana qalalaryna 36 mln teńgege deıin, basqa óńirlerge 30 mln teńgege deıin;
Almaty men Astanada tek jańa turǵyn úı satyp alýǵa bolady, al basqa aımaqtarda – kez kelgen turǵyn úı, sonyń ishinde qaıtalama naryqtaǵy jeke úılerdi alýǵa bolady;
Qaryz alýshynyń sońǵy 5 jylda jeke baspanasy bolmaýy kerek;
Qatysýshynyń "Otbasy bankinde" keminde 2 mln teńge depozıti bolýy kerek.
Bul rette "Naýryz jumysker" ıpotekasyna ónerkásip, energetıka, kólik, aýyl sharýashylyǵy, sý resýrstary salalarynyń mamandary qatysa alady.
Esterińizge sala keteıik, Qazaqstanda áskerı qyzmetkerlerge arnalǵan "Áskerı baspana" ıpotekalyq baǵdarlamasy qaıta ashylady. Tolyq aqparat 20 qazanda jarıalanady.