Profılaktıkalyq ekpeni alý úshin jumys kúnderi ǵana emes, demalys kúnderi de tirkelgen jeri boıynsha medısınalyq uıymǵa júginýge bolady.
Densaýlyq saqtaý mınıstrliginiń málimetinshe, qazir epıdemıologıalyq jaǵdaı turaqty baqylaýda, dep habarlaıdy Almaty-akshamy.kz
Elimizde qyzylshanyń taralýyna qarsy tıimdi kúres maqsatynda halyqty qosymsha jappaı ımmýndaý aıasynda vaksınasıalaýǵa jatatyn 1,5 mln adamnyń 608 myńnan astamy vaksına aldy.
Kún saıyn 30 myńnan astam adamǵa ekpe egiledi, dep habarlaıdy densaýlyq saqtaý mınıstrligi sanıtarıalyq-epıdemıologıalyq baqylaý komıteti.
"Qazirgi ýaqytta epıdemıologıalyq jaǵdaı turaqty baqylaýda, turaqtandyrý boıynsha barlyq qajetti shara qabyldanyp jatyr", - delingen habarlamada.
Vedomstvo aqparatynsha, qyzylshaǵa qarsy josparly vaksınasıalaý jalǵasýda. Jyl saıyn 1 jáne 6 jastaǵy 700 myńǵa jýyq bala egiledi.
Sondaı-aq, epıdemıalyq kórsetkishter boıynsha vaksınasıalaý júrgizilip jatyr. Buryn vaksına almaǵan jáne odan bas tartqan 133,3 myńnan astam adam egildi.
Qyzylsha jáne basqa da vaksınamen basqarylatyn ınfeksıalardyń profılaktıkasynda vaksınasıanyń mańyzy týraly halyqpen aqparattyq jumys jalǵasýda.
"Qabyldanǵan sharalardyń arqasynda qazirgi ýaqytta elimizdiń kóptegen óńirinde qosymsha ımmýndaýdyń oń dınamıkasy baıqalady. Máselen, Mańǵystaý, Almaty, Aqtóbe, Jambyl, Túrkistan, Abaı, Ulytaý oblystarynda sońǵy aptada qyzylshadan qorǵaý maqsatynda óz balalaryn vaksınasıalaýda halyqtyń belsendiligi artqan", - deıdi komıtettegiler.
Densaýlyq saqtaý mınıstrligi eldegi qyzylsha boıynsha qolaısyz epıdemıologıalyq jaǵdaıdy eskere otyryp, 5 jasqa deıingi balalardyń ata-analaryna qosymsha jappaı ımmýndaý aıasynda qyzylshaǵa qarsy vaksına alýǵa, 5 jastan 18 jasqa deıingi balalardyń ata-analaryna qyzylshaǵa qarsy 2 ekpe bolmaǵan kezde, profılaktıkalyq ekpe egýge keńes berdi.