Robototehnıkadaǵy serpilis: almatylyq oqýshylar AQSH-ta úzdik 10-dyqqa kirip, Jeneva, Sıngapýr jáne Afınada álem chempıondary atandy, dep habarlaıdy aqshamnews.kz
Almatyda «Almaty Daryny» ortalyǵynyń 2024 jylǵy jumysynyń qorytyndylary jarıalandy. Bul týraly Almaty qalasynyń óńirlik komýnıkasıalar qyzmetiniń baspasóz konferensıasynda ortalyq dırektory Gýlnur Karımǵajy málimdedi.
«Jyl boıy ortalyq 200-den astam zıatkerlik olımpıada men baıqaý uıymdastyryp, olarǵa 250 myńnan astam oqýshy qatysty. 2024 jyly Almatynyń 894 oqýshysy 32 halyqaralyq olımpıada men baıqaýǵa qatysyp, olardyń 604-i jeńimpaz jáne júldeger atandy», – dedi spıker.
Onyń aıtýynsha, halyqaralyq olımpıadalarda Qazaqstan quramasy sapynda Almatynyń 4 oqýshysy óner kórsetip, barlyǵy kúmis medal jeńip alǵan. Al respýblıkalyq jarystarda qala komandasy 63 medal ıelenip, «Úzdik olımpıadalyq komanda – 2024» ataǵyna ıe boldy.
Almatylyq oqýshylar olımpıadalarda ǵana emes, robototehnıka salasynda da joǵary jetistikterge jetýde. 2024 jyly qala komandasy AQSH-tyń Dallas qalasynda ótken chempıonatta úzdik 10-dyqqa endi. Budan bólek, almatylyqtar Jenevada (2022), Sıngapýrda (2023) jáne Afınada (2024) úsh ret álem chempıony atanǵan.
«Biz – 140-gımnazıa mektebiniń Uly Dala komandasymyz! Bizdiń robototehnıkadaǵy jolymyz 2022 jyly First Lego League týrnırinen bastaldy, al ýaqyt óte kele First Tech Challenge deńgeıine óttik. Qazir biz jarystarǵa qyzý daıyndalyp, barlyq bos ýaqytymyzdy strategıalardy jetildirýge, mehanızmder men baǵdarlamalaýdy damytýǵa arnaýdamyz», – dedi komanda múshesi Aıhanym Shamshadın.
«Sana Team» komandasynyń kapıtany Smaıl Daryn da óz jetistikterimen bólisti: «Biz robototehnıkamen eki jyldan astam ýaqyt aınalysyp kelemiz. Osy ýaqyt ishinde Avstralıa, Kıpr, Úndistan jáne Qyrǵyzstan sıaqty elderde boldyq, Qazaqstan atynan bedeldi marapattarǵa ıe boldyq. Qazir biz Hústondaǵy álemdik jarystarǵa daıyndalyp jatyrmyz jáne joǵary nátıje kórsetemiz dep úmittenemiz».
Aıta keteıik, Almatyda Ortalyq Azıadaǵy eń iri robototehnıka chempıonaty – sý resýrstary máselesine arnalǵan Almaty Tech Cup ótedi. Jeńimpazdar Qazaqstandy halyqaralyq arenada tanystyrý múmkindigine ıe bolady.