Astanada Jeńis kúni men aty ańyzǵa aınalǵan batyr, Keńes Odaǵynyń batyry Baýyrjan Momyshulynyń 115 jyldyǵyna arnalǵan erekshe jobanyń tusaýy kesildi. Shara aıasynda 600-den astam balanyń qatysýymen kólemi 2736 sharshy metrge jetetin alyp fotomozaıka jasalyp, el esinde qalatyn tarıhı oqıǵaǵa aınaldy, dep habarlaıdy Aqshamnews.kz
Uzyndyǵy 70 metr, eni 32 metrdi quraıtyn portret – Qazaqstanda buryn-sońdy bolmaǵan aýqymdaǵy óner týyndysy. Ár bala jeke fotoquramdas bólshek retinde mozaıkanyń bir bóligin jasap shyqqan. Bul erekshe tásil tek shyǵarmashylyqty ǵana emes, patrıottyq tárbıeni de nasıhattap otyr.
Keskinniń ózi – Baýyrjan Momyshulynyń beınesi. Batyrdyń ómiri men erligi týraly tarıhty keıingi urpaqqa jetkizýdiń bul joly – zamanaýı óner men urpaq sabaqtastyǵynyń erekshe úılesimi retinde baǵalanyp otyr.
Alyp fotomozaıka resmı túrde Qazaqstan rekordtar kitabyna endi. Bul týraly shara uıymdastyrýshylary men rekordty tirkeýge jaýapty ókilder málimdedi. Olar bul bastamanyń jastardy el tarıhyna degen qyzyǵýshylyǵyn arttyrýǵa sep bolatynyn atap ótti.
Fotomozaıka tek kórkemdik nysan emes, sonymen qatar eldik birlikti, patrıotızmdi jáne jas býynnyń ulttyq qundylyqtarǵa degen qurmetin beıneleıtin sımvol retinde tanyldy.
Mádenıettanýshy Sara Nazymqyzynyń aıtýynsha, mundaı joba qoǵamda rýhanı serpilis týdyryp, jastardyń batyr babalar tarıhyna degen kózqarasyn jańa deńgeıge shyǵarady. «Baýyrjan Momyshuly – batyrlyqtyń, ultjandylyqtyń sımvoly. Onyń beınesin júzdegen balanyń birlese otyryp jasaýy – urpaqtar sabaqtastyǵynyń kórinisi», – deıdi ol.
Sonymen qatar, bul shara Jeńis kúni qarsańyndaǵy mańyzdy mádenı is-sharalardyń birine aınalyp otyr. Elorda turǵyndary men qala qonaqtary alyp portretti kórý úshin arnaıy kelip, patrıottyq rýhty sezine aldy.