«Qarasora 2023» jedel aldyn-alý sharasy sheńberinde Esirtki qylmysyna qarsy is-qımyl basqarmasynyń qyzmetkerleri aımaq aýmaǵynda esirtki taratýmen aınalysqan 11 adamdy ustaý boıynsha operasıa júrgizdi,dep habarlaıdy Almaty-akshamy.kz.
Polısıa 58 keliden astam marıhýanany tárkiledi. Mundaı iri partıanyń qara naryqtaǵy quny 9 mln teńgeden asady. Esirtki jalǵa alynǵan garajda saqtalǵan. Sonymen qatar ózgelerge taratý úshin shaǵyn kólemde orama jasap otyrǵan.
- Qylmystyq top qatysýshylary 22 jastan 54 jasqa deıin. Qazirgi ýaqytta QR QİJK-niń 128-baby tártibinde 5 kúdikti ýaqytsha ustaý ızolátoryna qamaýǵa alyndy. Qalǵandaryna qatysty eshqaıda ketpeý týraly qolhat berý túrindegi bultartpaý sharasy qabyldandy. QR QK 297-babynyń 3-bóligi boıynsha bastalǵan sotqa deıingi tergeý aıasynda qajetti tergeý áreketteri júrgizilýde, - dedi Esirtki qylmysyna qarsy is-qımyl basqarmasynyń bastyǵy Nurjan Ahmetov.