Almatyda Almaty Clean & Green atty qalalyq ekologıalyq aksıa ótti. 50 myńnan astam turǵyn Tazarý kúni is-sharasyna shyǵyp, qala aýmaǵyn tazalaý jáne kórkeıtý jumystaryna qatysty. Olardyń ishinde memlekettik qyzmetkerler, depýtattar, belsendiler, stýdentter, sportshylar men medıa tulǵalar bar.
Qala ákimi Erbolat Dosaev kóshelerdi, qoǵamdyq oryndardy, saıabaqtardy, skverler men ózen jaǵalaýlaryn tazalaýdy qamtyǵan aksıaǵa qatysty.
Barlyq qatysýshyǵa qajetti jabdyqtar men quraldar berildi.
8 myń tekshe metrden astam qoqys jınalyp, qala ákimdiginiń kúshimen polıgonǵa shyǵaryldy.
Tazalaý jumystarynan keıin qazaqtyń ulttyq oıyndary, vıktorınalar men baıqaýlar uıymdastyrylǵan oıyn-saýyq baǵdarlamasy ótti.
Sonymen qatar, aksıa aıasynda jappaı kóshet otyrǵyzý jumystary júrgizildi – almatylyqtar 10 myńnan astam aǵash pen buta otyrǵyzdy. Qala aýmaǵynda alma, almurt, shegirshin, qaraǵan, úıeńki jáne shaǵan aǵashtary egildi.
Almatynyń komýnaldyq ınfraqurylymdy damytý basqarmasynyń basshysy Dýlat Áshkenov bul is-sharanyń tájirıbelik jáne tárbıelik áserine toqtaldy:
- Almaty Clean & Green – bir rettik aksıa emes, bul qalany kórkeıtýge baǵyttalǵan júıeli jumystyń bir bóligi. Bul bastama qalanyń barlyq aýdanyn qamtydy. Mundaı is-sharalar qalanyń kóriktenýine ǵana emes, turǵyndardyń aýmaǵyna degen jaýapkershiligin arttyrýǵa da kómektesedi, – dedi Dýlat Áshkenov.
Ekologıa salasyndaǵy bastamalarymen tanymal Evgenıı Muhamedjanov ekologıalyq mádenıettiń qalyptasýy mańyzdy ekenin atady.
- Ekomádenıetti qalyptastyrý – qala ózgerýiniń negizi. Mundaı is-sharalar Almatynyń ınvestısıalyq tartymdylyǵyn, týrısik áleýetin jáne ómir súrý sapasyn arttyrady. Biz týǵan qalamyz úshin qoldan kelgenniń bárin jasaýǵa daıynbyz, – dedi ekolog.
Qoǵam qaıratkeri, Qazaqstan Ulttyq ǵylym akademıasynyń múshesi Rýstam Qaıryev bul bastamanyń bolashaq urpaq úshin mańyzdy ekenin aıtty.
- Biz jaı ǵana qoqys jınap jatqan joqpyz – biz ekologıalyq sanaly qoǵamnyń negizin qalyptastyryp jatyrmyz. Osynda kelgenime óte qýanyshtymyn, – dedi ol.
Qazaqstannyń eńbek sińirgen qaıratkeri Bekish Qudaıbergen de aksıany qoldady.
- Men mundaı bastamalarǵa qurmetpen qaraımyn Bul jaı senbilik emes, qalanyń bolashaǵyna qosqan úles, óskeleń urpaq úshin úlgi. Almatyny taza ári jasyl qala retinde saqtaýymyz kerek, bul barlyǵymyzǵa baılanysty, – dedi ol.
Qazaqstannyń eńbek sińirgen qaıratkeri Aıgúl Qosanova bul aksıanyń turǵyndardy biriktiretinin atady.
-Mundaı aksıalar shabyttandyrady. Ártúrli jastaǵy, túrli mamandyqtaǵy adamdardyń ortaq maqsat úshin birigýi – óte áserli, – dedi ol.
Qoǵam qaıratkeri Beknur Qısyqov bul aksıa azamattyq belsendilikti nyǵaıtatynyn aıtty.
- Biz óz isimiz arqyly qalaǵa degen qamqorlyq mádenıetin qalyptastyramyz. Almaty Clean & Green – bul ekologıalyq bastama ǵana emes, bul – nemquraıly emes jandardy biriktiretin qozǵalys, – dedi ol.
Qazaqstannyń eńbek sińirgen qaıratkeri Sulýshash Nurmaǵambetova senbiliktiń tárbıelik máni zor ekenin jetkizdi.
- Jastardy osyndaı is-sharalarǵa tartý óte mańyzdy. Bul – tek tazalyq sharasy emes, bul azamattyq jaýapkershilik pen týǵan jerge degen súıispenshilikti tárbıeleýdiń mektebi. Almatyda turyp jatqanyma 50 jyldaı boldy, men qalamyzdyń eń taza qala bolǵanyn qalaımyn! – dedi ol.
Ánshi Asqat Tarǵyn da senbilikke qatysyp, oıyn bólisti:
- Mundaı aksıalar adamdardy biriktirip, qorshaǵan ortany qorǵaýǵa úıretedi. Ekologıa qarapaıym áreketterden bastalady. Búgin men bul jerge ánshi retinde emes, Almaty turǵyny retinde keldim. Qalamyzdy taza ustaý ári jasyl jelek aınaldyrý – bizdiń qolymyzda, – dedi ol.
Ánshi Alma Amanjolova bul ekologıalyq aksıaǵa árkimniń qatysýy kerektigin jetkizdi:
- Árbirimiz ortaq iske úles qosýymyz kerek. Mundaı senbilikter jastardyń tabıǵatqa qurmetpen qaraýyn qalyptastyrady. Men qýana qatystym jáne barshańyzdy osyndaı ıgi sharaǵa atsalysýǵa shaqyramyn. Biz, ıaǵnı halyq kóp, al Almaty bireý! – dedi ol.
Óz kezeginde ánshi Tolqyn Zabırova da aksıaǵa qatysyp, áserimen bólisti:
- Maǵan adamdardyń ıgi is úshin birigýi unaıdy. Mundaı bastamalar týǵan jerge degen súıispenshilikti tárbıeleıdi. Almaty – bizdiń úıimiz, ony taza ári ádemi ustaý – bizdiń mindetimiz, – dedi Tolqyn Zabırova.
Teatr jáne kıno aktrısasy Móldir Serikbaı shyǵarmashylyq adamdardyń mundaı aksıaǵa qatysýynyń mańyzdylyǵyn atap ótti:
- Biz, óner adamdary, sahnadan mańyzdy nárselerdi jıi aıtamyz. Biraq búgin men sózben emes, ispen kórsetkim keldi. Qalaǵa degen mahabbat – oǵan qamqorlyq jasaýdan bastalady, – dedi ol.
Almaty Clean & Green ekologıalyq aksıasy almatylyqtardyń qalany taza ustaýǵa degen shynaıy yqylasyn kórsetti. Ár býyn men túrli kásip ókilderi senbilikke qatysyp, qalasyn jaqsy kóretinin naqty isimen dáleldedi.
