Endi smartfonǵa baılanǵan búldirshinder qazaqsha jańa sózder jattaı alady.
Imanǵalı Bektursyn atty Vashıngtonda turatyn 5-synyp oqýshysy qazaq tilin balalarǵa úıretýdiń tyń tásilin oılap tapty, dep habarlaıdy Almaty-akshamy.kz «Habar 24» arnasyna silteme jasap.
Jalpy, AQSH-ta turatyn qazaqtar úshin ana tilin umytpaý - ózekti másele. Balasynyń qazaqsha sóıleýine ata-analar da múddeli bolǵandyqtan, jyl saıyn tildik kýrstarǵa suranys ta artyp keledi. Vashıngton qalasynda eki birdeı til kýrsy jumys isteıdi. Qazaqstan elshiligi ózge shtattardan túsken ótinishterdi eskere otyryp, "Otandastar" qorymen birlesip, onlaın formatta qazaq tilin úıretý máselesin pysyqtap jatyr.
Imanǵalı Bektursyn AQSH-qa byltyr kúzde kelgen. 500 ǵalym jobasy boıynsha taǵylymdamadan ótip jatqan anasy Jazıra Saıyn senbi saıyn Amerıkadaǵy balalarǵa qazaqsha úıretedi. Ol qurdastary men ini-qaryndastarynyń qazaqshaǵa shorqaq ekenin kúnde kórip júr. Bir jaǵynan, anasyna kómekteskisi kelip, ekinshi jaǵynan, oıyn arqyly tildi ońaı meńgerýge bolatynyn túsinedi. Sóıtip, Roblox-ta qarapaıym tapsyrmalar jasaıdy.
"Ol - oıyn platformasy, qalaǵan adam ózi oıyn istep, sol platformaǵa sala alady", - deıdi Imanǵalı Bektursyn.
Balalar arasynda óte tanymal Roblox platformasynyń múmkindigi mol. Kez kelgen paıdalanýshy óziniń oıynyn qurastyryp, vırtýaldy álemde túrli tapsyrma oryndaı alady. Metakeńistikte ózara kezdesip, saýda jasap, úı janýarlaryn asyrap, túrli maman ıesi sıaqty jumysqa da barýǵa bolady.
"Taýyqtyń qazaqshasy qalaı bolady? Munda tańdaý bar. Baqa nemese taýyq. Baqaǵa kirse, oıyn qaıta bastalady. Taýyqqa kirse, oıyn jalǵasa beredi", - dep túsindirdi 5-synyp oqýshysy.
Qazaq tili klýbyna kelip júrgen búldirshinderdiń kóbi shet elde dúnıege kelgen. Sabaq barysynda ózderin tanystyrǵan balalardyń biri Londonda, endi biri Malaızıada, Monǵolıada týǵan. Dıplomat ata-ana balasynyń ana tilin qurmetteıtin azamat bolyp óskenin qalaıdy. Sondyqtan senbi saıyn eshkim sabaqtan qalmaıdy.
Qazaqı orta joq, árıne, olarǵa qazaq tilin úırený qıyn. Sondyqtan AQSH-taǵy elshilik qazaq tili klýbyn ashyp, eriktilerdi tartyp jatqany jaqsy bastama", - deıdi DJ. Vashıngton ýnıversıtetinde taǵylymdamadan ótýshi Jazıra Saıyn.
Jazıra Saıyn AQSH-ta sabaq oqý úshin mektepke qýana baratyn búldirshinder qazaqsha klýbqa da óz erikterimen, jaıdary kóńil-kúımen kelgenin qalaıdy. Sol úshin tapsyrmany úıip-tókpeı, erkin formatta, oıyn túrinde ótkizedi. Basty mindet – ár balanyń kókeıine qazaq eline degen súıispenshik qalyptastyryp, erteden ana tilin sińirý.