Memleket basshysynyń tapsyrmasy boıynsha bos jatqan jáne zańsyz paıdalanýǵa berilgen jerlerdi memleket menshigine qaıtarý sharasy jalǵasyp jatyr, dep habarlaıdy Almaty-akshamy.kz.
«Bıyl jyl basynan beri memleket menshigine paıdalanylmaı turǵan jáne zańnamany buza otyryp berilgen 1,8 mln gektar aýyl sharýashylyǵy jerleri qaıtaryldy. Jyl sońyna deıin memleket menshigine jalpy kólemi 5 mln gektar jerdi qaıtarý jospary bar. Memlekettik menshikke qaıtarylǵan jerler birinshi kezekte halyqty jaıylymdyq jerlermen qamtamasyz etýge baǵyttalady. Qaıtarylǵan jerler aýdandardyń rezervine qoıylady. Halyq tıisti jaıylym jerlermen qamtyǵan keıin qalǵan bóligi konkýrsqa shyǵarylady», - degen jaýap aldyq Aýyl sharýashylyǵy mınıstrliginen resmı saýalǵa.
Mınıstrliktiń habarlaýynsha, jaıylym týraly zańnamaǵa ózgerister men tolyqtyrýlar engizilip jatyr.
«Qazirgi ýaqytta Parlament májilisi depýtattarynyń bastamasymen ázirlengen «Jaıylymdardy paıdalaný máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań jobasy aıasynda eldi mekenderge irgeles jatqan jaıylymdyq jerlerdi basqa alqaptarǵa aýystyrýǵa tyıym salý bóligine, Jer kodeksine, sondaı-aq, «Jaıylymdar týraly» zańǵa ruqsat etilgen júkteme normasyn 20-dan 50% deıin arttyrý boıynsha túzetý engizilgeli jatyr. Jergilikti atqarýshy organdar atalǵan zańǵa engiziletin ózgeristerdi nazarǵa ala otyryp halyqty jaıylym jerimen qamtýdy jergilikti deńgeıde sheshýi kerek», - deıdi vedomstvodan.