8 jylǵa sozylǵan dekrettik demalystan keıin sportshy ana boksqa qaıta oralǵan.
Áıgerim Sáttibaeva bokstan 48 keli salmaq dárejesinde Qazaqstan chempıony atandy, - dep habarlaıdy Aqshamnews.kz.
– Jarys joǵary deńgeıde, tartysty ótti. Jeke ómir men sportty qatar alyp júrý ońaı emes. Óıtkeni kópbalaly ana bolǵannan keıin balalaryma da kóńil bólip, jattyǵýlarymdy da ýaqytyly isteý kerek. Biraq joldasym janymda qoldap júredi. Men joq kezde joldasym balalarmen qalady, – deıdi ol «Búgin LIVE» baǵdarlamasyna bergen suhbatynda.
Áıgerim Sáttibaeva uzaq ýaqyt dekrettik demalysta bolsa da óz qalpyna ońaı kelgenin aıtady.
– Men 8 jyl dekrette otyrdym. Ol kezde jattyǵýlarymdy, rıngti qatty saǵynatynmyn. Qaıta oralýǵa sol saǵynyshym áser etti. Boksqa kelgennen keıin fızıkalyq jáne tehnıkalyq turǵyda ózimdi qalypqa keltirý jeńil boldy. Onyń aldynda da tájirıbem bar edi. Joldasym da, jeke bapkerim de jan-jaqty kómektesti, – deıdi boksshy.