Almatynyń Dýman shaǵyn aýdanyndaǵy sorǵy stansıasyn rekonstrýksıalaý 35 myń turǵyndy úzdiksiz sýmen qamtamasyz etedi, dep habarlaıdy almaty-akshamy.kz
Almaty ákimi Erbolat Dosaev jumys sapary barysynda jáne Medeý aýdanynyń turǵyndarymen kezdesý kezinde 20 myńnan astam adam turatyn Dýman shaǵyn aýdanyndaǵy sý rezervýarlaryn, magıstraldyq sý qubyry men sorǵy stansıasyn qaıta jańartý barysyn tekserdi. Sýmen jabdyqtaý máselesi 11 jyldan astam ýaqyt boıy turǵyndardy alańdatyp keledi.
Medeý aýdanynyń ákimi Erkebulan Orazalın qala basshysyna aýyz sý tapshylyǵy problemalary jáne Dýman sh/a aýyz sýmen jabdyqtaýdyń qosymsha kózin qamtamasyz etý jónindegi damý josparlary týraly baıandady. Búgingi tańda jumys istep turǵan rezervýarlardyń ótkizý qabileti táýligine 2,6 myń tekshe metrdi quraıdy. Jazǵy kezeńde táýligine 2,2 myń tekshe metr tutyný tapshylyǵy baıqalady, bul rette kóppáterli úılerdiń 4-5 qabatyna sý jetpeıdi. Budan basqa, shaǵyn aýdan aýmaǵynda 2025 jylǵa deıin paıdalanýǵa beriletin jańa turǵyn úı keshenderiniń qurylysy júrgizilýde, bul óz kezeginde Dýmandaǵy halyqtyń ósimin 15 myń adamǵa arttyrady jáne sý tutynýdyń qosymsha tapshylyǵyn týdyrýy múmkin.
Almaty ákimi Erbolat Dosaev nysandy tehnıkalyq tekserýdi daıyndaýdy jedeldetýdi jáne jobany qurylys basqarmasyna jedel tapsyrýdy tapsyrdy.
«Qala turǵyndaryn sýmen qamtamasyz etý-basty mindet. Biz Dýman shaǵyn aýdanynyń tez óskenin bilemiz, belsendi qurylys júrip jatty, sáıkesinshe ınjenerlik jelilerdiń qýaty jetispeıdi, sonyń ishinde aýyz sý tapshylyǵy bar. Tehnıkalyq baıqaýdan keıin burynǵy nysandy qaldyramyz ba álde jańasyn salamyz ba, tıisti sheshim qabyldaımyz», - dep atap ótti qala basshysy.
Sondaı-aq, Erbolat Dosaev aýdan ákimine, qurylys jáne energetıka jáne sýmen jabdyqtaý basqarmasynyń basshylaryna ınjenerlik komýnıkasıalardy turǵyn úılerge jetkizý boıynsha úderisterdi jedeldetýdi tapsyrdy.