3 naýryzdan bastap azamattardan ótinish qabyldaý bastaldy
34 myńnan astam otandasymyz bankrottyqqa ótinish bildirgen. Bul týraly Qarjy vıse-mınıstri Erjan Birjanov málim etti, dep habarlaıdy Almaty-akshamy.kz.
«3 naýryzdan bastap azamattardan bankrot dep jarıalaý boıynsha ótinish qabyldaý bastaldy. 31 naýryzdaǵy jaǵdaı boıynsha, 34 myńnan asa ótinish kelip tústi. Ótinishter negizinen eGov.kz elektrondyq Úkimet portaly (94%) jáne e-Salyq Azamat mobıldi qosymshasy arqyly (6%) túsip jatyr», – dedi Erjan Birjanov ortalyq komýnıkasıalar qyzmeti alańynda ótken baspasóz máslıhatynda.
Onyń aıtýynsha, Qazaqstan azamattarynyń tólem qabiletin qalpyna keltirý jáne bankrottyq týraly» zań talaptaryna sáıkes 15 jumys kún ishinde salyq organdary azamattyń myna talaptarǵa sáıkestigin tekseredi:
- bank, mıkroqarjy uıymdary jáne kolektorlyq agenttikter aldyndaǵy qaryzy 5,5 mln teńgeden aspaýy kerek (1600 AEK);
- qaryzdyń ótelmegenine 12 aıdan asýy kerek;
- ortaq menshiktegi múlikti qosa alǵanda, menshik quqyǵynda múlik bolmaýy kerek (avtokólik, páter, úı, jer telimi, banktegi depozıt jáne t.b.);
- bankpen, mıkroqarjy uıymdarymen borysh boıynsha retteý rásiminiń júrgizilýi.
«Ataýly áleýmettik kómekti 6 aı qatarynan alýshylar úshin jáne bereshegi 5 jyldan artyq ótelmegen azamattar úshin bólek tekseris júrgiziledi. Tekserý memlekettik organdar, bankter men kredıttik búronyń elektrondyq bazalarymen esep aıyrysý arqyly «Qoldau» jeke tulǵalardyń bankrottyǵy aqparattyq júıesinde avtomatty túrde jasalady», - deıdi vıse-mınıstr.
Eske salaıyq, 3 naýryzda elimizde bankrottyqqa ótinim qabyldaý bastaldy. Atalǵan proses týraly tolyǵyraq osy silteme arqyly tanysýǵa bolady.