Memlekettik keńesshi Erlan Qarınniń tóraǵalyǵymen Shetelde kadr daıarlaý jónindegi respýblıkalyq komısıanyń kezekti otyrysy ótti, dep habarlaıdy Almaty-akshamy.kz. Aqorda-ǵa silteme jasap.
Komısıa sheshimimen 182 qazaqstandyq azamatqa «Bolashaq» stıpendıasy berildi.
Onyń ishinde 149 stıpendıat magıstratýrada, 7 adam doktorantýrada bilim alady, sondaı-aq 26 azamat álemniń jetekshi joǵary oqý oryndary men óndiristik ortalyqtarynda taǵylymdamadan ótedi.
Stıpendıattardyń 62 paıyzy jaratylystaný-tehnıkalyq baǵytta, al qalǵan 38 paıyzy qoǵamdyq-gýmanıtarlyq baǵyt boıynsha bilim alady.
Sonymen qatar komısıa músheleri ǵalymdarǵa dúnıejúziniń mańdaıaldy ǵylymı ortalyqtarynan taǵylymdamadan ótý úshin beriletin granttardy qarastyrdy.
Komısıa sheshimimen 328 qazaqstandyqqa grant berildi.
«Bolashaq» stıpendıasyna qujat qabyldaý bıylǵy qyrkúıek aıynyń ortasyna deıin jalǵasatynyn aıta ketý kerek.
Al ǵylymı taǵylymdamadan ótý baǵdarlamasyna konkýrstyq irikteý 2023 jyldyń qazan aıynyń ortasyna deıin jalǵasady.
Jıyn qorytyndysy boıynsha Memlekettik keńesshi birqatar naqty tapsyrma berdi.