Qazaqstanda 2014 jyldan bastap qyrkúıektiń ár sońǵy jeksenbisinde Eńbek kúni atap ótiledi.
Bul óziniń adal eńbegimen egemen elimizdiń ekonomıkasynyń negizin qalaǵan, sondaı-aq «Jalpyǵa ortaq eńbek qoǵamyn» damytýǵa úles qosqan eńbekqor jandarǵa alǵys bildirýge arnalǵan mereke, dep habarlaıdy aqshamnews.kz.
Eńbek kúni álemniń 100-den astam elinde atap ótiledi, al keıbir elderde ol memlekettik mereke mártebesine ıe. Qazaqstanda bıyl mereke 29 qyrkúıekke sáıkes keledi.
Jyl saıyn Eńbek kúnin merekeleý qarsańynda túrli is-sharalar ótkiziledi, onyń maqsaty qoǵamdaǵy «Eńbek adamy» mártebesin arttyrý jáne eńbek ónimdiligin yntalandyrý; kásiporyndar men uıymdarda jańa eńbek áýletterin qalyptastyrý úshin eńbek adamdary týraly oń qoǵamdyq pikir qalyptastyrý, sondaı-aq jastardy eńbekke qurmetpen qaraý, eńbek dástúrlerin saqtaý jáne kóbeıtý rýhynda tárbıeleý.
Sondaı-aq, óńirlerde eńbek ardagerleri, óndiris ozattary jáne t.b. alǵys hattarmen jáne ózge de kótermeleý sharalarymen marapattalady.
«Eńbek kúni – kúntizbedegi ataýly kún bolǵanymen birge, bul jumys sapasynyń kórsetkishi. Eńbek jáne áleýmettik qorǵaý mınıstrligi Qazaqstan Respýblıkasynyń eńbek naryǵyn damytýdyń 2024 – 2029 jyldarǵa arnalǵan tujyrymdamasyn iske asyrý sheńberinde sapaly jumys oryndarynyń sanyn ulǵaıtý boıynsha josparly jumys júrgizýde, atap aıtqanda, olar: bul turaqty jumyspen qamtý, qaýipsiz jumys ortasy, eńbekaqynyń laıyqty deńgeıi, áleýmettik kepildikter.
Bıyl Eńbek kúnin merekeleýdiń negizgi mısıasy árbir qazaqstandyq otbasy men tutastaı memlekettiń ál-aýqaty, sondaı-aq turaqtylyǵynyń kepili retinde adal jáne asyl eńbek ıdeıasyn damytý bolyp tabylady» – dep atap ótti QR Eńbek jáne halyqty áleýmettik qorǵaý mınıstri Svetlana Jaqypova..
Merekeniń jalpy tujyrymdamasy eńbek qundylyqtaryn keńinen ilgeriletýge jáne olardyń mártebesi men áleýmettik jaǵdaıyna qaramastan, «Eńbek adamyna», ártúrli kásipter men mamandyqtardaǵy adamdarǵa qurmetpen qaraýdy qalyptastyrýǵa arnalǵan. Bul úndeý Memleket basshysynyń 2024 jylǵy 2 qyrkúıektegi «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýynda aıtylǵan sózderimen ushtastyrylǵan.
Esterińizge sala keteıik, 2014 jyldan bastap Eńbek jáne halyqty áleýmettik qorǵaý mınıstrligi Eńbek kúnin merekeleýge arnalǵan respýblıkalyq forým ótkizip keledi. Forým aıasynda «Eńbek joly» respýblıkalyq konkýrsynyń jeńimpazdaryna qurmet kórsetý men zeınetkerlik jasqa tolǵan jáne eńbek qyzmetinde eń joǵary nátıje kórsetken eńbek ardagerlerin «Eńbek ardageri» medalimen marapattaý ótkiziledi.