Ońtústik Koreıada osyndaı ózgeriter oryn alýy múmkin.
Jergilikti avtoóndirýshilerdiń biri dástúrli qozǵaltqyshy bar modelderdi satýdy toqtatady, dep habarlaıdy Almaty-akshamy.kz 24.kz-ke silteme jasap.
Bul sharalar halyqtyń elektrmobılderge kóshýin jyldamdatpaq. Qazir turǵyndar arasynda ekologıalyq taza mashınalardyń úlesi tym az. Sondyqtan bıilik osyndaı qadamdarǵa barýǵa májbúr.
Seýlden 80 shaqyrym jerde ornalasqan Asan qalasynda 198 myńǵa jýyq kólik tirkelgen. Onyń 3400-i ǵana elektr qozǵaltqyshymen jabdyqtalǵan, bul 2 paıyzǵa da jetpeıdi. Sondyqtan bolar elektr qýatymen júretin kólikterge arnalǵan qýattaý beketteri bos turady. Stansıa táýlik boıy jumys isteıdi jáne munda mashınany tegin qýattaýǵa múmkindik bar. Elektr kólikterdi zertteıtin Kım Hen Il 10 jyl boıy benzınmen júretin kólikti tizgindeıdi. Keler jyly ol elektromobılge kóshýdi josparlap otyr.
«2025 jyly elektr kólikteriniń sany kúrt ósedi. Sonda zarádtaý beketteri jetpeýi múmkin, al qazir tapshylyq joq. Elektr kólikterge aqyly jolda júrýge 50% jeńildik bar. Qýattaý ádettegi qozǵaltqyshqa qaraǵanda 2 ese arzan. Sonymen qatar, elektr kólikti satyp alǵanda memleket 7 jarym myń dollardan astam sýbsıdıa beredi», - deıdi sarapshy Kım Hen Il.
Elektr kóliktiń eń úlken kemshiligi - órt qaýipsizdigi. Statısıkaǵa sáıkes, elektr mashınada órt jıi tirkelmese de, qyzyl jalyndy sóndirý óte qıyn.
«Ońtústik Koreıadaǵy erejege sáıkes, kópqabatty úı salý kezinde avtoturaqtardyń 50 paıyzy elektromobılderge arnalǵan bolýy kerek. Bul ádette jerasty turaǵy. Biraq, eger órt bolsa, elektromobıl tez janyp, órt kórshi kólikterge, sodan keıin turǵyndardyń páterlerine taralýy múmkin. Sondyqtan elektromobılderdi kóshe turaqtaryna nemese ǵımarattardyń shatyryna qoıǵan durys», -deıdi Koreıa órtti zertteý qaýymdastyǵynyń prezıdenti Kım Gvan Son.
Elektrkólikterdiń ózge de kemshilikterine toqtalatyn bolsaq, ony qýattaý jarty saǵatqa sozylýy múmkin. Al tolyq qýattalǵan kezde elektromobıl eń kóp degende 500 shaqyrym júre alady. Sýyq mezgilde batareıa tez taýsylady. Sonymen qatar, onyń qyzmet etý merzimi 7 jyl, sodan keıin jańa batareıa satyp alýy kerek. Al onyń baǵasy – jańa elektrkólik baǵasynyń shamamen 40%-yna teń. Elektromobılderdiń barlyq kemshiligine qaramastan, ońtústikkoreıalyq júrgizýshiler mundaı kólikterge kóshýge májbúr bolady. Óıtkeni janar-jaǵarmaı óndirýge qajetti shıkizattyń júz paıyzyn syrttan ákelýge týra keledi. Sonymen qatar, atmosferaǵa taralatyn qaldyqtardy azaıtý boıynsha halyqaralyq mindettemelerdi oryndaý qajet. 2035 jyldan bastap Ońtústik Koreıa ishten janatyn qozǵaltqyshy bar kólikterdi tirkeýge tyıym salýdy josparlap otyr. Al iri jergilikti avtoóndirýshilerdiń biri 2040 jyldan bastap benzın men dızeldi qozǵaltqyshtary bar modelderdi satýdy toqtatady. Bul aldaǵy 15 jylda kólikterdiń deni elektr qýatyna tolyqtaı kóshedi degen sóz.