100 myńnan astam jumys oryndary ashylatyn bolady.
Qazaqstan Úkimeti 2030 jylǵa qaraı jumys kúshindegi jastar úlesin 60 paıyzǵa jetkizýdi kódep otyr. Bul týraly Ortalyq komýnıkasıalar qyzmetinde ótken brıfıńte Qazaqstan Respýblıkasynyń Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy Almaty-akshamy.kz.
Tamara Dúısenova sóz basynda Memleket basshysy óz Joldaýynda jastardy jumyspen qamtýdy qamtamasyz etý jáne eńbek resýrstarynyń sapasyn arttyrý máselelerine erekshe nazar aýdarǵanyn atap ótti.
«Jyl saıyn respýblıka boıynsha 300 myńnan astam jas adam eńbekke qabiletti jasqa jetip, eńbek naryǵyna shyǵady. 2030 jylǵa qaraı jumys kúshindegi jastar úlesi 60 paıyzǵa jetedi dep kútilýde»,- delingen Eńbekmıni baspasóz qyzmetiniń habarlamasynda.
Olardyń jumyspen qamtylýyn qamtamasyz etý úshin memlekettik jáne jeke bastamalar aıasyndaǵy jobalar boıynsha jyl saıyn jastar úshin memleket tarapynan sýbsıdıalanatyn 100 myńnan astam jumys oryndary ashylatyn bolady.
«Jastardy jumyspen qamtýǵa járdemdesýdiń belsendi sharalarymen qamtý keńeıedi. Jyl saıyn 40 myń túlek jastar tájirıbesine qatysady. «Dıplommen aýylǵa» baǵdarlamasyna qatysýshylar úshin jastar tájirıbesiniń bóligi retinde tólenetin tıisti tólemderge teń bolatyndaı qosymsha járdemaqy belgilenedi. «Alǵashqy jumys» jobasy UBT tapsyra almaǵan nemese oqýyn jalǵastyrmaǵan mektep túlekterine arnalyp, qaıta baǵyttalatyn bolady», - dedi Tamara Dúısenova.
Eńbek jáne halyqty áleýemettik qorǵaý mınıstri Memleket basshysynyń tapsyrmasy boıynsha Mınıstrlik agrokredıttik korporasıamen birlesip, jastardyń kásipkerlik bastamalaryn qoldaý maqsatynda jyldyq mólsherlemesi 2,5 paıyzben jeńildetilgen nesıe berýdiń tetikteri men parametrlerin ázirlep jatqanyn qosymsha aıtyp ótti. Jyl saıyn bul qoldaýdy 6 myńǵa deıin jas paıdalanady. Bul maqsattarǵa búdjette qarastyrylǵan soma jyl saıyn shamamen 30 mıllıard teńgeni quraıdy.
Halyqtyń áleýmettik osal toptaryndaǵy jastarǵa bıznes-ıdeıalaryn júzege asyrý úshin jyl saıyn 1,2 mıllıon teńgeden astam somaǵa 9 myń qaıtarymsyz granttar beriletin bolady.