QR kólik mınıstri Marat Qarabaev Úkimet otyrysynda temirjol jyljymaly quramyn jańartý jáne vagondar parkin jańartý boıynsha júrgizilip jatqan jumystar týraly baıandady, dep habarlaıdy aqshamnews.kz.
Mınıstrdiń aıtýynsha, qazirgi ýaqytta lokomotıv parkiniń jalpy sany shamamen 1,8 myń birlikti quraıdy, al onyń tozý deńgeıi 61%-dy quraıdy.
«Jyljymaly qurammen qamtamasyz etý jáne parktiń tozý deńgeıin tómendetý maqsatynda bıyl 185 lokomotıv satyp alyndy. Kelesi jyly 187 birlik satyp alý josparlanǵan, al odan keıingi úsh jylda taǵy 257 lokomotıv jetkiziledi dep kútilýde. Bul lokomotıvterdiń jetispeýshiligin tolyq joıýǵa yqpal etedi», — dedi mınıstr.
Kólik mınıstrliginiń málimetinshe, júk vagondarynyń jalpy parki 139 myń vagondy quraıdy.
Naryqta 300-den astam jeke operatorlar jumys isteıdi. Olardyń ishinde «Qazaqstan temir joly» 38 myń vagonǵa ıe, olar elimizdiń energetıkalyq sektoryn qamtamasyz etý men halyqqa kómir tasymaldaýda mańyzdy ról atqarady.
2026 jylǵa deıin ulttyq operator qosymsha 3 myń ashyq vagon satyp alýdy josparlap otyr, onyń 800 birligi bıyl qoldanysqa engizildi.
Jolaýshylar vagondary parkine de erekshe nazar aýdarylýda. Ótken jyly 118 jańa vagon satyp alynǵan bolsa, bıyl 143 birlik jetkiziledi. Kelesi jyly 226 vagon satyp alý josparlanǵan.
«Jalpy, 2029 jylǵa deıin 1 myń 200-ge jýyq jolaýshylar vagondary satyp alynady, nátıjesinde vagon parki 3 myń birlikten asyp, onyń tozý deńgeıi 38%-ǵa deıin tómendeıdi. Osy mindetterdi oryndaý úshin otandyq óndirýshilerdiń vagondaryn satyp alý múmkindigimen jalǵa beretin Birikken lızıńtik kompanıa qurý usynylady», — dep málimdedi Marat Qarabaev.