Úkimet 2026 jylǵy búdjettiń negizgi baǵyttaryna qansha qarajat bólinetinin anyqtady, - dep habarlaıdy aqshamnews.kz tilshisi.
Parlament Májilisiniń jalpy otyrysynda qarjy mınıstri Mádı Takıev 2026-2028 jyldarǵa arnalǵan respýblıkalyq búdjet shyǵystarynyń negizgi parametrlerin qaraý kezinde Úkimet azamattardyń ómir súrý sapasy men ekonomıkanyń ornyqty damýyna basymdyq bere otyryp, áleýmettik baǵdarlanǵan baǵytty jalǵastyratynyn atap ótti.
Máselen, Qarjy mınıstrliginiń málimetinshe, densaýlyq saqtaý salasyna 2,7 trln teńge qarastyrylǵan. Bıylmen salystyrǵanda bul qarajat 107 mlrd teńgege artyq. Bul medısınalyq qyzmetterdiń qoljetimdiligin arttyrýǵa múmkindik beredi.
Bilim jáne ǵylym salasyna 901,7 mlrd teńge josparlanǵan. Bilim berý prosesiniń sapasyn jaqsartý, daryndy jastardy qoldaý jáne ǵylymı ortalyqtardy damytý boıynsha basymdyqtar saqtaldy.
2026 jyly mádenıet, týrızm jáne sportty damytýǵa 263,5 mlrd teńge qarastyrylǵan. Memleket basshysynyń turaqty ekonomıkalyq ósýdi qamtamasyz etý jónindegi tapsyrmasyn oryndaý maqsatynda memlekettik qoldaý sharalaryna keshendi taldaý júrgizildi.
2026 jyly ekonomıkany yntalandyrýǵa shamamen 1,2 trln teńge josparlandy, al naqty sektordy damytýǵa jumsalatyn qarajattyń jalpy kólemi 540 mlrd teńgege artyp, 3,7 trln teńge bolmaq. Bul sharalar jańa salalyq ósý draıverlerin iske qosýǵa jáne eldiń ınvestısıalyq áleýetin nyǵaıtýǵa múmkindik beredi.
Negizgi basymdyqtardyń biri óńirlerdi damytý bolyp qala beredi. Óńirlerdi damytýǵa 2026-2028 jyldarǵa 581 mlrd teńge qarastyrylǵan, onyń ishinde 2026 jyly - 300 mlrd teńge. Bul jobalar asa mańyzdy jáne jalpyhalyqtyq mańyzǵa ıe. Ákimdikterdiń derbestigin arttyrý maqsatynda 2026 jyly óńirlerge transfertter arqyly 5,1 trln teńge baǵyttalady.
Kúshtik qurylym blogyna 2026 jyly 3 trln teńge bólinedi, bul bıylmen salystyrǵanda 335 mlrd teńgege artyq. Osylaısha, 2026 jyly qorǵanys shyǵyndary - JİÓ-niń 1%-y.
Qarajat tek jaýyngerlik daıyndyqty qoldaýǵa ǵana emes, sonymen qatar júıelik ınovasıalardy iske asyrýǵa da jumsalady.