Sarapshylar bıyl Qazaqstanda jyljymaıtyn múlik naryǵynda aıtarlyqtaı ózgerister bolmaıtynyn aıtady, dep habarlaıdy aqshamnews.kz
Osy salany zerttep júrgen sarapshylardyń boljamy boıynsha, 3-shi jáne 4-shi sanattaǵy páterlerdiń baǵasy turaqty deńgeıde saqtalýy múmkin. Bul sanattaǵy turǵyn úıler, ıaǵnı komfort jáne ekonom-klass páterler, ózderiniń baǵalyq turaqtylyǵymen erekshelenedi. Onyń sebebi – qurylys materıaldarynyń kópshiligi otandyq ónimderden alynatyndyǵynda. Bul óz kezeginde sharshy metrdiń ózindik qunyna áser etip, ony turaqty deńgeıde ustap turýǵa kómektesedi.
Qazaqstan jyljymaıtyn múlik federasıasynyń basshysy Ermek Músirepov Tengrinews.kz saıtyna bergen suhbatynda halyqtyń tólem qabilettiliginiń áli de tómen ekenin atap ótti. Qazirgi ýaqytta kóptegen azamattar páterdi tolyq tólep satyp alý múmkindigine ıe emes. Sonymen qatar, ıpotekalyq baǵdarlamalar arqyly da bul máseleler sheshilmeı qalýda. Osy sebepti qurylys kompanıalary túrli jeńildikter men aksıalardy usynyp, naryqtaǵy baǵany qoljetimdi etýge tyrysýda. Mysaly, 2024 jyldyń ekinshi jartysynda keıbir qurylys kompanıalary sharshy metr qunyn 20-25%-ǵa deıin tómendetken.
Ermek Músirepovtyń aıtýynsha, Qazaqstannyń jyljymaıtyn múlik naryǵy ekonomıkalyq daǵdarystar men álemdik stagnasıa kezeńderinen ótip, qazirgi kezde turaqtalyp keledi. Ol naryqta baǵa baıaýlap, «qoljetimdi» turǵyn úı shyn máninde halyq úshin qoljetimdi bolýǵa bet alǵanyn atap ótti.
2025 jyly Qazaqstannyń jyljymaıtyn múlik naryǵynda aıtarlyqtaı dúrbeleń nemese baǵa ósýi kútilmeıdi. Naryqtaǵy baǵa turaqty bolyp qalady, al halyq úshin qoljetimdi turǵyn úı máselesi birshama oń sheshimdermen alǵa jyljıdy. Qurylys kompanıalary men memleket tarapynan qoldaý sharalary jalǵasady, bul óz kezeginde naryqtaǵy jaǵdaıdy turaqty ustap turýǵa múmkindik beredi.