Qazaqstan Respýblıkasy Oqý-aǵartý mınıstrliginiń málimetinshe, 2025 jyly balalardy mektepke deıingi tárbıe jáne oqytýmen qamtýdy 95%-ǵa deıin ulǵaıtý josparlanyp otyr, dep habarlaıdy aqshamnews.kz
Mektepke deıingi uıymdarǵa barmaıtyn balalardyń ata-analaryna ádistemelik qoldaý kórsetý maqsatynda, balalardyń otbasylyq jaǵdaıda tárbıe alýy, damýy jáne kútimi máseleleri boıynsha keńes berý pýnkti sanyn 4 245-ke deıin arttyrý josparlanǵan. Memlekettik 260 balabaqshada qaıta jóndeý jumystary júrgizilip, qural-jabdyqtar jańartylady. 500 myń bala qazaq tilin tereń oqytý boıynsha «Tilge boılaý» pılottyq jobasyna qatysady. 2025 jyly elimizdiń barlyq óńirinde «Qarajatty balanyń sońynan ilestirý» qaǵıdaty boıynsha mektepke deıingi tárbıe jáne oqytý uıymdaryn vaýcherlik qarjylandyrý júıesin engizý josparlanyp otyr.
Orta bilim berýde 272,8 myń oqýshyǵa arnalǵan oryn engizý; erekshe qajettiligi bar balalardyń 90%yn arnaıy psıhologıalyq-pedagogıkalyq qoldaý jáne erte jastan túzetý sharalarymen qamtý; fızıka, hımıa, bıologıa, robototehnıka, STEM pánderi boıynsha 1 myń zamanaýı kabınet satyp alý; 1,3 myń aýyl mektebin qaıta jańartý jobasyn iske qosý josparlanýda.
Kolejderde tehnıkalyq jáne kásiptik bilim berý baǵyty boıynsha suranysqa ıe mamandyqtarǵa (9-synyp túlekterin) 100% tegin oqytýmen qamtý; jumysqa ornalastyrý mindettemesimen maqsatty tapsyrysty 10 myń orynǵa ulǵaıtý; jan basyna shaqqandaǵy normatıvtik qarjylandyrý kólemin 2 esege arttyrý; jeke ınvestısıa tartý arqyly 80 kolejdiń materıaldyq-tehnıkalyq bazasyn nyǵaıtý jáne jabdyqtaý; kolejderde shaǵyn 10 kásiporyn ashý josparlanyp otyr.