Jańa oqý jylynda Qarýly Kúshterdiń Áýe qorǵanysy kúshteriniń avıasıalyq bólimderi oqý-jattyǵý ushýlaryn oryndaýǵa kiristi, - dep habarlaıdy Aqshamnews.kz.
Qorǵanys mınıstrliginiń málimetinshe, 2025 jyly ekıpajdardyń jalpy ushý ýaqyty 12 myń saǵattan asty jáne bul kórsetkish jyl saıyn artyp keledi.
Oqý is-sharalary ushý ekıpajdarynyń, ınjenerlik-tehnıkalyq quramnyń jáne qamtamasyz etý bólimsheleriniń kásibı deńgeıin arttyrýǵa baǵyttalǵan. Baǵdarlamaǵa trenajerlarda sabaqtar ótkizý, qaýipsizdik talaptarynyń saqtalýyn tekserý, shtattan tys jaǵdaılarda áreket etý daǵdylaryn pysyqtaý, ushý quramynyń, ushýdy basqarý toptarynyń jáne avıasıalyq tehnıkanyń daıyndyǵyn baqylaý kiredi. Ushýlar barysynda ekıpajdar áýe shaıqasyn júrgizýdiń zamanaýı tásilderin meńgerip, jerústi jáne teńiz nysandaryna avıasıalyq soqqylar jasaýdy pysyqtaıdy. Ásirese áýe barlaýyn júrgizý jáne radıoelektrondyq kúres quraldaryn qoldaný máselelerine erekshe nazar aýdarylady.
«Bul joǵary jaýyngerlik daıyndyq deńgeıin saqtaýǵa jáne jańa taktıkalyq tásilderdi kúndelikti tájirıbege ýaqtyly engizýge múmkindik beredi», – dep atap ótti 19132 áskerı bóliminiń shtab bastyǵy podpolkovnık Tımýr Sandybaev.
Ushý ekıpajdary jabdyqtalǵan jáne jabdyqtalmaǵan alańdarǵa desantty tasymaldaý jáne túsirý, shartty túrde jaralanǵandardy evakýasıalaý, izdestirý-qutqarýdy qamtamasyz etý, túrli júkterdi, sonyń ishinde syrtqy aspaǵa bekitilgen júkterdi tasymaldaý mindetterin de oryndaıdy. Ushý tapsyrmalarynyń oryndalý sapasyn obektıvti baqylaý materıaldary negizinde nusqaýshylar qadaǵalaıdy. Ushýlar kóriný shekteýli, jaýyn-shashyndy, aýa temperatýrasy kúrt ózgeretin kúrdeli meteorologıalyq jaǵdaılarda ótedi.
Taýly aımaqta ushýlar qubylmaly jel aǵyndary men atmosferalyq qysymnyń ózgerýine baılanysty qıyndaıdy, al sý ústinde vızýaldy baǵdarlardyń bolmaýy áser etedi. Túngi ýaqytta ushqyshtar túngi kórý quraldaryn qoldanady, al jasyryn áreket elementterin pysyqtaý kezinde borttyq jaryq shamdary óshirilgen kúıde ushady. Áýe qorǵanysy kúshterinde avıasıalyq bólimderdiń jaýyngerlik daıarlyǵyna bólinetin ýaqyttyń jyl saıyn turaqty túrde artyp kele jatqany atap ótiledi.