Respýblıkalyq joldar 100 paıyz normatıvtik qalypqa keltiriledi.
Bul týraly QR Úkimetiniń keńeıtilgen otyrysynda Premer-Mınıstr Álıhan Smaıylov aıtty, dep habarlaıdy Almaty-akshamy.kz QazAqparatqa silteme jasap.
«Avtojol salasynda barlyq halyqaralyq tranzıttik dálizderdi tolyq jańǵyrtý josparlanýda. 2025 jylǵa deıin respýblıkalyq joldardyń - 100, al jergilikti joldardyń 95 paıyzyn normatıvti qalypqa keltirý josparlanǵan. Sonymen birge, 52 avtokólik ótkizý pýnktin modernızasıalaý júrgizilýde», - dedi Álıhan Smaıylov.
Úkimet basshysynyń atap ótýinshe, «Dostyq-Moıynty» temirjol ýchaskesiniń 2-shi joldarynyń qurylysy bastaldy. «Darbaza-Maqtaaral», «Baqty-Aıagóz» jáne «Almaty stansıasy aınalma temirjol jelisi» jobalary boıynsha tıisti qujattamalary daıyndalýda.
«Qazaqstan temir jolyn kólik-logıstıkalyq kompanıaǵa aınaldyrý bastaldy. Kerekti Quzyrettilik ortalyǵy quryldy. Onyń negizgi mindeti jańa logıstıkalyq ónimderdi uıymdastyrý jáne tranzıttik júk aǵyndaryn Transqazaqstandyq marshrýttarǵa baǵdarlaý bolyp tabylady», - dedi Premer-Mınıstr.
Onyń aıtýynsha, Transkaspıı halyqaralyq marshrýttardy damytý maqsatynda Qazaqstan, Ázirbaıjan, Grýzıa jáne Túrkıanyń kólik jáne ınfraqurylym mınıstrlikteriniń arasynda tıisti Jol kartalary qabyldandy.
«Qazaqstan tarapynan «konteınerlik hab» salýdy, saýda flotyn 10 parommen tolyqtyrýdy jáne porttyq stansıalardy keńeıtýdi qosa alǵanda, Aqtaý jáne Quryq porttarynyń qýattaryn kóterý josparlanýda. Sıngapýrlyq PSA kompanıasymen birlesip Sıfrlyq kólik dálizin qurý jónindegi joba iske asyrylýda», - dedi ol.