2025 jyldyń sáýirine deıin Aral teńizine shamamen 1,6 mlrd tekshe metr sý jiberý josparlanyp otyr.
Bul týraly Sý resýrstary jáne ırrıgasıa mınıstri Nurjan Nurjigitov málimdedi, dep habarlaıdy aqshamnews.kz sala mınıstrligine silteme jasap.
Mınıstr azamattardy qabyldap, Aral teńizin saqtaý máselesi týraly suraqtarǵa jaýap berdi.
Aıta keteıik, 2023 jyldyń qazan aıynan 2024 jylǵy sáýirge deıin Aral teńizine shamamen 1,3 mlrd tekshe metr, al jyl basynan beri 2 mlrd tekshe metr sý jiberildi.
Sondaı-aq, Soltústik Aral máselesi osy aıdyń basynda Túrkimenstanda ótken Ortalyq Azıanyń Memleketaralyq sý sharýashylyǵyn úılestirý komısıasynyń (MSSHÚK) 87-shi otyrysynyń kún tártibinde boldy.
«Jyl basynan beri Soltústik Aralǵa shamamen 2 mlrd tekshe metr sý jiberildi. Búgingi tańda teńizdegi sýdyń jalpy kólemi 22 mlrd tekshe metrge jetti. Sý dıplomatıasy men Ortalyq Azıadaǵy áriptesterimizben tyǵyz jumystan bólek, teńizdi toltyrýda sý únemdeý tehnologıalaryn engizý de mańyzdy ról atqarady. Jańa tehnologıalardy engizýdiń nátıjesinde bıyl Qyzylorda oblysynyń sharýalary 200 mln tekshe metrge jýyq sý únemdedi. Bul sý Soltústik Aralǵa jiberildi. Másele óte mańyzdy, biz ony jan-jaqty qarastyryp, únemi baqylaýda ustaımyz»,- dedi Sý resýrstary jáne ırrıgasıa mınıstri Nurjan Nurjigitov.
Eske sala keteıik, mınıstr Túrkimenstanda ótken kórshi eldermen kelissózder qorytyndysy boıynsha 1-shi sáýirge deıin Shardara sý qoımasyna 11 mlrd tekshe metr sý jiberý týraly kelisken bolatyn. Bul elimizdiń ońtústik aımaqtaryna 2025 jylǵy sýarý maýsymy úshin qajetti sý kólemin jınaýǵa múmkindik beredi.