Senat depýtattary Premer-Mınıstrge saýal joldady
2024 jyldan bastap aýyldyq búdjetterge qosymsha salyqtar men tólemder beriledi. Bul jaıynda Senat depýtattarynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy Almaty-akshamy.kz QazAqparat-qa silteme jasap.
«Búdjet kodeksine sáıkes búdjet prosesinde oblystyq búdjettiń aýdandyq mańyzy bar qalalardyń, aýyldardyń, kentterdiń, aýyldyq okrýgterdiń búdjetterimen ózara qarym-qatynasyna jol berilmeıdi. Budan basqa, búdjetaralyq qatynastar memlekettik basqarýdyń deńgeıleri arasynda fýnksıalar men ókilettikter ara jiginiń aıqyn ajyratylýyna, respýblıkalyq, oblystyq búdjetter, respýblıkalyq mańyzy bar qalalardyń, astananyń búdjetteri, aýdandyq (oblystyq mańyzy bar qalalar) búdjetter, aýdandyq mańyzy bar qalalardyń, aýyldardyń, kentterdiń, aýyldyq okrýgterdiń búdjetteri arasynda túsimder men shyǵystardyń birkelki bólinýine, sondaı-aq búdjetaralyq transfertterdi aıqyndaý ádisteriniń birligi men ashyqtyǵyna negizdelgen», - dedi Úkimet basshysy jaýabynda.
Premer-Mınıstrdiń túsindirýinshe, Ekologıa kodeksine sáıkes qorshaǵan ortaǵa jaǵymsyz áser etkeni úshin tólemaqy boıynsha túsimder josparyn ýákiletti organ bekitetin qorshaǵan ortany qorǵaý jónindegi is-sharalarǵa tolyǵymen jiberiledi. Osyǵan baılanysty bul tólem 4-shi deńgeıdegi búdjetke berilýge jatpaıdy. Sonymen qatar, búdjettiń 4-shi deńgeıiniń qarjylyq múmkindikterin kúsheıte otyryp, jergilikti ózin-ózi basqarýdy (budan ári – JÓB) nyǵaıtý jalǵasýda. Aýyldyq okrýg ákimi menshik ıeleriniń jer ýchaskelerin utymdy jáne maqsatty paıdalanýy úshin jaýaptylyqta bolatynyn eskere otyryp, 2022 jyldan bastap biryńǵaı jer salyǵy, jer ýchaskelerin paıdalanǵany úshin tólemaqy, jer ýchaskelerin satýdan túsetin túsimder jáne jer ýchaskelerin jaldaý quqyǵyn satqany úshin tólemaqy búdjettiń tórtinshi deńgeıine berildi.
«JÓB damytýdyń 2025 jylǵa deıingi tujyrymdamasyna sáıkes jergilikti mańyzy bar máselelerdi sheshý kezinde búdjettiń 4-deńgeıiniń joǵary turǵan deńgeıden qarjylyq táýeldiligin tómendetý kózdelgen. Tujyrymdamada 2024 jyldan bastap aýyldyq búdjetterge qosymsha salyqtar men tólemderdi (sý resýrstaryn paıdalanǵany úshin tólemaqy; jekelegen qyzmet túrlerimen aınalysý quqyǵy úshin lısenzıalyq alym; jekelegen qyzmet túrlerimen aınalysýǵa ótkizý arnalǵan lısenzıalardy paıdalanǵany úshin tólemaqy (alkogól ónimin saqtaý jáne boıynsha) berý kózdelgen. Osylaısha, qoldanystaǵy kiris kózderi túsimderdiń qosymsha túrlerin búdjettiń 4-shi deńgeıine berý arqyly ulǵaıady. Sonymen qatar, aýyldyq okrýgtiń ýchaskelik polıseıleri salatyn aıyppuldy aýyldyq okrýgtiń búdjetine berý jergilikti búdjettiń 4-shi deńgeıi kiris bóliginiń nyǵaıýyna qaraı odan ári qaralatyn bolady», - dedi Álıhan Smaıylov.