QR Premer-Mınıstri Álıhan Smaıylovtyń tóraǵalyǵymen ótken Joǵary ǵylymı-tehnıkalyq komısıa otyrysynda ǵylymdy damytýdyń 2024-2026 jyldarǵa arnalǵan basym baǵyttaryn aıqyndaý máselesi qaraldy.
Otyrysty ashqan Úkimet basshysy kúni keshe ǵana Dúnıejúzilik zıatkerlik menshik uıymy 2023 jylǵa arnalǵan Jahandyq ınovasıalyq ındeksti jarıalanǵanyn atap ótti. Ol ǵylymǵa, bilim berý júıesine jáne ınfraqurylymǵa qatysty 80-ge jýyq kórsetkishti qamtıdy, dep habarlaıdy Almaty-akshamy.kz Primeminister.kz saıtyna silteme jasap.
«Qazaqstan Úndistan men Irannan keıin Ortalyq jáne Ońtústik Azıa aımaǵy boıynsha úzdik 3 ınovasıalyq ekonomıkanyń qataryna endi. Sıfrlyq damý, Ǵylym jáne joǵary bilim mınıstrlikteri elimizdiń halyqaralyq arenadaǵy pozısıalaryn jaqsartý úshin ǵalymdarǵa qajetti jaǵdaı jasaý jáne ınfraqurylymdy damytý jumystaryn jalǵastyrýy kerek», - dedi Álıhan Smaıylov.
Vedomstvo basshysy Saıasat Nurbek halyqaralyq tájirıbeni, atap aıtqanda, Eýropalyq Odaq elderi, Kanada, Avstralıa, Malaızıa, Ispanıa jáne basqa da memleketterdi, sondaı-aq Memleket basshysynyń halyqqa Joldaýynda jáne basqa da baǵdarlamalyq qujattarda belgilengen strategıalyq mindetterdi eskere otyryp, aldaǵy jyldarǵa arnalǵan ǵylymdy damytýdyń alty basym baǵyty ázirlengenin aıtty. Ulttyq qaýipsizdikti qamtamasyz etý baǵyty jeke qarastyrylatyn bolady.
Bul tizimge «Ekologıa, qorshaǵan orta jáne tabıǵatty utymdy paıdalaný», «Energıa, ozyq materıaldar jáne kólik», «Ozyq óndiris, sıfrlyq jáne ǵaryshtyq tehnologıalar», «Eldiń zıatkerlik áleýeti», «Ómir jáne densaýlyq týraly ǵylym» jáne «Agroónerkásip keshenin turaqty damytý» baǵyttary endi. Óz kezeginde, baǵyttardyń árqaısysy 8-den 18-ge deıingi bólikterden turady.
Jalpy, belgilengen basymdyqtar sheńberinde sý resýrstaryn utymdy paıdalaný, topyraq sapasyn saqtaý, energetıkalyq qaýipsizdikti (sonyń ishinde jylý energıasyn) qamtamasyz etý, parnıktik gazdar shyǵaryndylaryn azaıtý jáne jańartylatyn kózderdi damytý máselelerine nazar aýdarylady.
Sonymen qatar qurylys, mashına jasaý, ónerkásip, kólik tehnologıalary, robototehnıka, jasandy ıntellekt, jańa materıaldar jasaý, telekomýnıkasıa, medısına, farmasevtıka, mal sharýashylyǵy, eginshilik, aýyl sharýashylyǵy ónimderi men shıkizatyn óńdeý jáne saqtaý, tamaq ónimderin óndirý jáne t.b. salalarynda zertteýlerdi qoldaý josparlanyp otyr. Jaratylystaný ǵylymdary salasyndaǵy irgeli jáne qoldanbaly zertteýler de qarastyrylǵan.
Talqylaý jáne daýys berý nátıjeleri boıynsha Joǵary ǵylymı-tehnıkalyq komısıa atalǵan tásilderdi maquldady.
Sonymen qatar jıynda 2024-2026 jyldarǵa arnalǵan basym baǵyttar boıynsha qarjylandyrý kólemin bólý jáne ǵylymı-tehnıkalyq mindetterdi júzege asyrý máseleleri qaraldy.