Úkimet Halyqtyń tabysyn arttyrýdyń 2025 jylǵa deıingi baǵdarlamasyn iske asyrýdy jalǵastyrady.
Úkimettiń baspasóz qyzmeti 2023 jyly atqarylatyn jumystardyń josparyn jarıalady, dep habarlaıdy Almaty-akshamy.kz Úkimettiń baspasóz qyzmetine silteme jasap.
Zeınetaqy men járdemaqynyń jáne eń tómengi jalaqynyń artýy, eń tómengi kúnkóris deńgeıiniń ósýi, «Jaıly mektep» jáne «Aýyldyq densaýlyq saqtaýdy jańǵyrtý» ulttyq jobalaryn júzege asyrý, jańa damý baǵdarlamalaryn, 5G baılanys jelilerin iske qosý, sondaı-aq shaǵyn qalalar men aýyldarda ınternet sapasyn arttyrý – Memleket basshysynyń tapsyrmasy boıynsha Úkimet iske asyryp jatqan osy jáne basqa da ózgerister men bastamalar bıyl qazaqstandyqtardyń turmys sapasyn jaqsartýǵa ıgi áserin tıgizetin bolady.
2023 jylǵy 1 qańtardan bastap respýblıkada eń tómengi jalaqy mólsheri (ETJ) 60 000 teńgeden 70 000 teńgege deıin ulǵaıtyldy. Eńbek kodeksi boıynsha jumys berýshiler ETJ-dan tómen emes deńgeıde jalaqymen qamtamasyz etýge mindetti ekenin eskersek, barlyq salalarda ártúrli menshik nysanyndaǵy kásiporyndarda jumys isteıtin 1,8 mln-ǵa jýyq jaldamaly qyzmetkerdiń aqshalaı kirisi ósedi.
Úkimet dárigerlerdiń, muǵalimderdiń, búdjet salasynyń basqa da qyzmetkerleriniń jáne óndiristik personaldyń jalaqysyn kezeń-kezeńmen ulǵaıtýdy kózdeıtin Halyqtyń tabysyn arttyrýdyń 2025 jylǵa deıingi baǵdarlamasyn iske asyrýdy jalǵastyrady.