Telegram-paıdalanýshylary 2023 jyldyń shildesinde álemde pandemıanyń jańa tolqyny bastalatynyn jazyp jatyr. Koronovırýstyń ólimge ákeletin shtamy shyǵyp, jańa aýrý – COVID-23 paıda bolady-mys. Aqparattyń ras-ótirigin Stopfake.kz bilýge tyrysty, dep habarlaıdy Almaty-akshamy.kz Inform.kz-ke silteme jasap.
«Bul boljamnyń «dáleli» retinde qastandyq teorıasyn jaqtaýshylar kórkem fılmdi jáne The economist jýrnalynyń muqabasyn alǵa tartady. Ekeýin de taldap shyǵaıyq.
Fılm "Tordaǵy qus. Aýrý juqtyrý" («Ptısa v kletke. Zarajenıe») dep atalady. Ol 2020 jyly COVID-19 pandemıasy sharyqtaǵan kezde shyqqan. Onda 2023 jyly aýyr derttiń paıda bolǵany, sondaı-aq 2024 jyly qoǵamnyń túbegeıli ózgergeni týraly aıtylady. İri qalalarda qatań lokdaýn jarıalandy, al naýqastar oqshaýlaý aımaqtaryna jiberilip, olarǵa eshqandaı kómek kórsetilmedi. Bul «Obıtel zla» nemese «Hodáchıe mertvesy» ómirde bolatynyna sengenmen birdeı.Tipti, fılmdi túsirgender mıllıondaǵan adamnyń ómirin qıǵan aýrýdy paıdalanyp, óz atyn shyǵarmaq boldy, kórermendi odan saıyn qorqytyp, olarǵa karantındik sharalar men densaýlyq saqtaý júıesiniń jumysy týraly qate túsinik berdi dep aıyptaldy.
The Economist jýrnalynyń muqabasyna keletin bolsaq, onda da jańa pandemıa boljanbaǵan. Paıdalanýshylar silteme jasaǵan basylym 2021 jyldyń 13 jeltoqsanynda shyqqan. Onda ótken jyl qorytyndylanyp, kelesi jyldyń qandaı bolatyny týraly boljamdar jazylǵan. Jýrnal sanynyń muqabasynda buryn bolǵan oqıǵalardyń belgileri men adamdar beınelengen. Máselen, SARS-CoV-2 vırýsynyń sýreti jańa pandemıanyń bolatynyn emes, bastalǵan pandemıanyń beınesi boǵlan», - dep jazady Stopfake.kz.
Aıta keteıik, 2021 jyly The Economist jýrnaly COVID-19 indeti 2022 jyly basylady dep jazdy. Jańa mýtasıalardyń paıda bolýy jáne karantın sharalarynyń kúsheıtilýi osy jáne basqa maqalalarda aıtylmaǵan.
«Demek, 2023 jyly jazda álemde jańa pandemıa bolady, jańa COVID-23 aýrýy paıda bolady dep sanaýǵa negiz joq», - dep túıindelgen saıtta.