Al 2025 jyldan bastap jappaı ótkizile bastaıdy.
Ákimderdiń saılaýyna úmitkerlerdi tirkelgen saıası partıalar jáne ákim usyna alady, dep habarlaıdy Almaty-akhsamy.kz Inbusiness.kz cilteme jasap.
Ulttyq ekonomıka mınıstrliginiń habarlaýynsha, keler jyly saılaý qanatqaqty rejımde, al 2025 jyldan bastap jappaı ótkizile bastaıdy.
Aldymen oblys máslıhattary oblys ákiminiń usynysy boıynsha aýdandar men oblystyq mańyzy bar qalalardyń (oblystyń ákimshilik ortalyǵyn qospaǵanda) tizbesin jáne saılaý ótetin kúndi bekitýleri qajet.
Kandıdattardy aýyl ákimderin saılaý úderisindegideı, ıaǵnı tirkelgen saıası partıalar jáne ákim usyna alady.
"Eger usyný merzimi aıaqtalǵan kezde, bir ǵana kandıdat bolsa, oǵan balama retinde oblys ákimi ekinshi kandıdatty usyna alady. Al kandıdattar múldem bolmasa, onda oblys ákimi eki kandıdatýrany usynady. Ózin-ózi usynǵan kandıdat saılaýǵa qatysýy úshin, tıisti ákimshilik-aýmaqtyq birlikte turatyn saılaýshylardyń keminde bir paıyz qolyn jınaýy kerek. Kandıdattar zańda belgilengen eń tómengi jalaqynyń bes eselengen mólsherinde saılaý jarnalaryn engizýge tıis. Eger saılaý qorytyndylary boıynsha kandıdat ákim bolyp saılansa nemese daýys berý qorytyndylary boıynsha kandıdat daýys berýge qatysqan saılaýshylar daýysynyń keminde bes paıyzyn jınasa, sondaı-aq kandıdat qaıtys bolǵan jaǵdaıda engizilgen jarnalar kandıdatqa nemese saıası partıaǵa qaıtarylady", – dep habarlady mınıstrlik.
Qalǵan jaǵdaılarda saılaý jarnasy kandıdatqa qaıtarylmaıdy. Sondaı-aq tirkelgenge deıin kandıdat jáne onyń zaıyby (jubaıy) turǵylyqty jeri boıynsha memlekettik kirister organdaryna usyný merzimi bastalǵan aıdyń birinshi kúnine aktıvter men mindettemeler týraly deklarasıa tapsyrady. Eger málimetter burys ne anyq bolmasa, aýmaqtyq saılaý komısıasy kandıdatty tirkeýden bas tartýǵa quqyly.
"Aýdandar men oblystyq mańyzy bar qalalar ákimderiniń saılaý naýqanyn ótkizýdiń jalpy kezeńi shamamen 60 kún, onyń ishinde saılaý qorytyndylaryn shyǵarýǵa jáne nátıjelerdi belgileýge bólingen kúnderdi eseptemegende 50 kúndi quraıdy", – dep habarlady mınıstrlik.
Aýdandar men oblystyq mańyzy bar qalalardyń ákimderine kandıdat Qazaqstan Respýblıkasynyń azamaty bolýy jáne 25 jastan tómen bolmaýy, sondaı-aq jekelegen memlekettik saıası laýazymdarǵa qoıylatyn biliktilik talaptaryna sáıkes kelýi tıis.
Kandıdat eńbek ótili boıynsha talaptardyń 11 nusqasynyń bárine de sáıkes kelýi tıis. Bul rette memlekettik qyzmette jumys tájirıbesiniń bolýy mindetti emes. Mysaly, keminde bes jyl jumys ótili, onyń ishinde ortasha jyldyq shtat sany keminde elý adam bolatyn orta kásipkerlik sýbektileriniń ne komersıalyq emes uıymdardyń basshy laýazymdarynda keminde eki jyl jumys ótili nemese Prezıdenttik jastar kadrlyq rezervine alynǵan adamdar úshin keminde bes jyl jumys ótili jáne taǵy basqalar bolýy múmkin.
Saılanatyn ákimniń ókilettik merzimi – 4 jyl. Bir adam qatarynan eki retten artyq aýdan (oblystyq mańyzy bar qala) ákimi bolyp saılana almaıdy. Sonymen qatar aýdan jáne oblystyq mańyzy bar qala máslıhattaryna máslıhat depýtattarynyń jalpy sanynyń keminde besten biriniń bastamasy boıynsha ákimge óz mindetterin tıisinshe oryndamaǵan jaǵdaıda senimsizdik bildirý týraly máseleni qaraý jónindegi ókilettikter beriledi. Bul jaǵdaıda máslıhat depýtattardyń jalpy sanynyń kópshilik daýysymen ákimge senimsizdik bildirýge jáne joǵary turǵan ákimniń aldyna ony qyzmetten bosatý týraly másele qoıýǵa quqyly.
Eske sala ketsek, Ulttyq ekonomıka mınıstrligi Memleket basshysynyń azamattarǵa aýdan ákimderin qanatqaqty rejimde saılaýǵa múmkindik berý jónindegi tapsyrmasyn oryndaý úshin oblys aýdandary men oblystyq mańyzy bar qalalar ákimderin tikeleı saılaýdy engizý boıynsha zańnamalyq túzetýler ázirlegen bolatyn. Bul normalar "Qazaqstan Respýblıkasynyń keıbir konstıtýsıalyq zańdaryna Memleket basshysynyń 2022 jylǵy 16 naýryzdaǵy Joldaýyn iske asyrý máseleleri boıynsha ózgerister men tolyqtyrýlar engizý týraly" Konstıtýsıalyq zańynda jáne "Qazaqstan Respýblıkasynyń keıbir zańnamalyq aktilerine Memleket basshysynyń 2022 jylǵy 16 naýryzdaǵy Joldaýyn iske asyrý máseleleri boıynsha ózgerister men tolyqtyrýlar engizý týraly" zańynda qarastyrylǵan. Osy jyldyń 5 qarashasynda atalǵan zańdarǵa Prezıdent qol qoıdy.